KANIADTO sa wa pa maigo sa Covid-19 ang atong nasud, ang naghatag labad sa ulo sa mga motorista ug biyahidor gikan sa dakbayan sa Sugbo padulong sa norte ug pabalik mao ang baga nga trapiko diha sa lungsod sa Consolacion nga mabara og hapit usa ka oras. Apan sa naghinapos nga tuig sa 2018, nahatagan og gamay nga sulbad sa mga opisyal sa Consolacion ang problema sa trapiko.
Karon, ang baga nga trapiko naa na sa lungsod sa Liloan ug Compostela. Apan mas grabe ang trapiko sa Liloan kay sa Compostela tungod sa eskina nga atubangan sa simbahan, nga anha mag-abot ang mga sakyanan gikan sa norte sa Cebu, kadtong mopadulong sa norte, ingon man ang mga sakyanan nga gikan sa Catarman, Liloan nga mosulod sa lungsod ug moliko padung sa Consolacion.
Usa sa mga hinungdan nganong maghuot ang trapiko sa interseksyon atubangan sa simbahan sa Liloan mao ang mga sakyanan nga gikan sa dakbayan sa Lapu-Lapu, Mandaue ug Cebu nga anha moagi sa tulay sa Cansaga, Consolacion nga nagsumpay sa dakbayan sa Mandaue. Mao ni ang wa mabantayi sa DPWH-7 sa paghimo sa tulay sa Cansaga, Consolacion nga makadugang sa trapiko ig-abot sa eskina sa Liloan atubangan sa simbahan.
Kaniadto nga wa pa masumpay sa tulay sa Cansaga ang Consolacion ug Mandaue, di man problema ang trapiko sa eskina atubangan sa simbahan. Unta, sa pagbuhat sa tulay sa Cansaga, gitan-aw na sa taga DPWH ang epekto sa trapiko nga gikan sa Cansaga ug national highway nga mag-abot sa eskina atubangan sa simbahan. Karon, nakita na ang epekto sa trapiko sa tulay sa Cansaga diha sa eskina atubangan sa simbahan sa Liloan.
Malouy ko magtan-aw sa traffic enforcers sa Liloan nga magkapuliki og dirihir sa mga sakyanan nga gikan sa siyudad sa Sugbo, gikan sa norte ug gikan sa Catarman nga mag-abot sa interseksyon atubangan sa simbahan.
Niadtong Sabado sa akong pagpadulong sa Danao City, duna koy nakita nga traffic sign "U-TURN HERE," nga gibutang taliwa sa dalan sa lungsod sa Liloan lapas sa munisipyo, alang sa mga sakyanan nga gikan sa Catarman nga mopadulong sa habagatan nga bahin sa Liloan o moadto sa Consolacion kay dili na palikoon sa wala sa interseksyon atubangan sa simbahan.
Ang wa makita sa naghatag sa maong solusyon nga ang U-turn slot atubangan sa dakong tindahan nakahatag na sad og kahinay sa dagan sa trapiko tungod kay ang mga sakyanan padulong sa habagatan ug sa norte mabara sa mga sakyanan nga motuyok tunga sa dalan, unya pun-an pa sa mga sakyanan nga moparking sa kilid sa highway.
Ang maayo unta nga gibuhat sa mga opisyal sa Liloan aron mahatagan og lugway ang trapiko sa eskina atubangan sa simbahan mao ang paghimo sa Parola nga rotunda diin motuyok lang ang mga sakyanan gikan sa habagatan nga padulong sa norte, ingon man ang mga sakyanan gikan sa Catarman nga moadto sa habagatan sa Liloan ug ang gikan sa lungsod nga moadto sa Catarman.