Wala mananghid sa lokal nga banda nga Agrressive Audio ang grupo sa usa ka pulitiko sa dakbayan sa Talisay nga nigamit sa ilang kanta sa pagpangampanya apan giusab ang lyrics niini.

Si Eugene Corpin, bokalista sa banda nga nahinabi sa mga tigbalita, nipadayag sa iyang kasagmuyo human sila nakadungog, nakakita nga ilang kanta gigamit sa pagpangampanya.

Gipadayag sa ilang banda nga gawas nga wala mananghid, dason ni Corpin, giilisan pa ang lyrics.,

Ngan sa opisyal gipugngan samtang gihuwat ang iyang habig.

Si Ian Zafra, publisher sa banda, nipadayag usab sa iyang kasagmuyo.

Gawas niini, nakit-an ang usa ka grupo nga pulitiko sa Talisay ang nigamit panahon sa ilang kampanya.

Ang kampo sa pulitiko gikatahong naay gidala-dala nga singer nga mokanta sa ilang kanta nga lahi na ang lyrics.

Si Zafra nibutyag nga ilang gikontak ang paryente sa nagkanta sa bag-ong lyrics sa “Liar Evil Ka” bahin niini pero nakapasagmuyo kanila kay lahi nga tubag ang ilang nadawat.

Matod ni Zafra, gitamay pa sila nga dili sila sikat.

“We ask them politely pero giingnan man hinuon mi nga mura man mo og kinsang sikata! Sakitan mi kay wala baya mi nagpagamit sa pulitika,” dugang ni Zafra.

Samtang, si Sidney Alburo, lead guitarist sa banda, nagkanayon nga walay bisan usa nila nga nagpaluyo aron sa pagpaabot sa ilang reklamo.

Gipadayag niini ang ilang kanta gihagoan nilag panahon, unya gamiton lang sa ubang pulitiko pag-ataki sa kaatbang.

“Wa mi labot anang pulitika kay di sab mi taga Talisay, dili sab mi botante sa Talisay,” dugang ni Alburo.

Si Zafra nagkanayon nga ilang gikontak ang pulitiko nga maoy gi-promote sa tuno sa ilang kanta nga giusab ang lyrics pero hangtud ning pagsuwat, wala pa silay nadawat nga tubag niini.

Bukas ang ilang kampo sa pagkakig-estorya. Pero kon di sila maminaw sa ilang panawagan, mohimo na sila og laing lakang.

Ang banda gilangkuban nila ni Eugene Corpin (bokalista, Sidney Alburo (rhythm guitarist), Joel Ablangue, (drummer), Vincent Ngalis (bass guitarist), Chris Artur Amores (lead guitarist).

Ang reklamo sa banda dunay kalambigitan sa copyright law sa Pilipinas, usa ka legal protection sa tag-iya sa original work, diin nagsabot kini alang sa matag produksiyon sa natad sa literary, scientific, ug artistic.

Ang Intellectual Property Office (IPOPHL) maoy nag-unang ahensiya nga responsable sa pagdumala sa registration ug conflict resolution sa intellectual property rights ug pagpatuman sa copyright laws.

Ang IPOPHL namugna pinaagi sa Republic Act No. 8293 o Intellectual Property Code of the Philippines nga niepekto sa Enero 1, 1998, ubos ni kanhi sa Presidentre Fidel V. Ramos.

Ubos sa balaod, ang kalapasan niini mag-atubang og silot nga pagkapriso sulod sa usa ngadto sa tulo ka tuig ug multa nga P50,000 ngadto sa P150,000 sa unang paglapas.

Apan tulo ka tuig ug usa ka adlaw ngadto sa unom ka tuig uban sa multa nga P150,000 ngadto sa P500,000 sa second offense.

Matag Abril 26, sumala sa Wikipedia, saulogon ang World Intellectual Property Day.