Wa makapugong ang pandemiya sa bandang ‘Blanknote’ nga mogama og awit human nga malampuson nilang na-compose ang ilang bag-ong single nga giulohan og ‘Tambag.’

Saysay pa ni Pretty Bacalso, rhythm guitarist sa banda, nga nagsugod lang sa lingawlingaw ang ilang pagsuwat og awit niadtong Abril 18, 2021.

Nahuna-hunaan ang pag-compose sa lyrics nga mahitungod sa paghatag og tambag ngadto sa mga nawad-an og paglaom o inspirasyon.

Matod pa ni Pretty nga simple ug catchy ang tono sa maong awit nga gipahaom ni Meljun Barazon, lead guitarist.

Inabagan sa ubang kauban nga si Jansent Malacat ang lead vocals ug bassista, ang paghan-ay sa lyrics sa ‘Tambag’ ingon man ang paghimo og tempo o beat sa drums pinaagi sa ilang drummer nga si Erickson Caballes.

“Nindot kaayo nig mensahe para sa mga tawo nga gahig ulo tambagan, like tambagan sa love life kay marupok, tambag sa kinabuhi, tambag sa barkada etc.

“With purpose ang message sa song to inspire people nga need og tambag,” pasabot ni Pretty.

Nasayran nga naporma ang ‘Blanknote’ niadto pang 2016 nga gilangkuban sa mga orihinal nga miyembro niini nga sila si Jansent, Meljun ug John.