Gialarma sa Mambaling Police Station sa Cebu City Police Office (CCPO) ang usa ka armadong tawo.
Wa sila magdahom nga ang mao nga tawo, usa ka habalhabal driver, mao ang giingong responsable sa mga kaso sa basag kotse ug lungkab sa mga sakyanan sa Metro Cebu sa nangaging mga semana.
Nasikop sa Mambaling police ang habalhabal driver human gialarma nga nagdala og armas ug illegal nga drugas niadtong Dominggo sa gabii, Abril 17, 2022 sa sitio Caimito, Barangay Basak San Nicolas, Dakbayan sa Sugbo.
Ang suspek giila nga si Allan Sabredo Perales, alyas “Ian”, 39, taga probinsya sa Lanao del Norte, apan kasamtangan nga nagpuyo sa Barangay Bulacao, Siyudad sa Sugbo.
Matod ni Police Lieutenant Colonel Ryan Devaras, deputy director for administration sa CCPO, nga nakadawat og tawag sa telepono ang Mambaling Police Station nga adunay tawo nga nagdala og armas.
Dali nga niresponde ang mga pulis sa pagpangulo ni Police Major Dindo Alaras, hepe sa Mambaling police station, diin ilang naabtan si Perales nga nagluklok og revolver nga adunay duha ka mga bala, lakip na ang duha ka pakete sa gituohang shabu ug duha ka bag gikan kaniya.
Atol sa imbestigasyon, ilang nasuta nga si Perales mao ang nag viral sa social media nga nibuak sa bildo sa bintana sa usa ka awto nga gi-park kilid sa karsada ug gikuha ang mga butang nga naa sa sulod.
Positibo usab nga giila si Perales sa ubang mga biktima sa kaso sa bukas kotse sa dakbayan sa Mandaue ug dakbayan sa Sugbo base sa mga kuha sa CCTV camera.
Dali ra nga nailhan si Perales sa iyang mga biktima tungod kay nakita ang iyang dagway sa CCTV lakip na ang iyang motorsiklo nga gisakyan.
Ang duha ka bag nga ilang nakuha giingong gipanag-iya sa tag-iya sa iyang gibuak nga sakyanan sa siyudad sa Mandaue.
Matod ni Devaras nga base niini, si Perales maoy responsable sa mga kaso sa basag kotse ug bukas kotse sa dakbayan sa Sugbo sa milabay nga mga buwan ug ning bag-o lang.
Sa data nga gitug-an ni Devaras, aduna nay lima ngadto sa unom ka mga kaso sa pagbuak sa bildo sa mga sakyanan nga gipang parking kilid sa karsada ug gikuha ang mga mahinungdanong butang.
Nagduda ang kapulisan nga adunay pay mga kauban si Perales nga wala pa niya gitug-an sa mga imbestigador.
Giawhag sa kapulisan ang mga biktima sa basag kotse nga mobisita sa Mambaling police station aron pag-ila sa suspek kon mao ba ang nikuha sa ilang mga butang.
“We have recovered bags, wallets nga gi identify na sa mga victims human makita na nila sa social media ang ilang mga items. We are advising them to proceed to Mambaling Police Station to somehow identify their belongings there,” matod ni Devaras.
Mamahimong daghan pa nga gibiktima si Perales nga wala lang ma report sa kapulisan ug dako ang posibilidad nga daghang kaso sa kawat ang masulbad sa iyang pagkasikop.