Dura: Sakripisyo alang sa nasud

NIADTONG Lunes, gihatud na sa katapusang pahulayan ang among suod nga higala ug miyembro sa Samahang Mag-aaral ng Pulitika Oldguards nga si Danilo "Donnie" Lumikid Jr., kinsa gipusil-patay samtang nagmaneho sa iyang motorsiklo alas 10:45 sa buntag niadtong Abril 1, 2022 didto sa Purok 10, Barangay Central, Manay, Davao Oriental.

Sa akong pagkaila ni Donnie, siya ang tawo nga adunay pagmahal sa iyang lungsod ug sa atong nasud mao nga aktibo siya sa mga organisasyon sa eskuwelahan ug sa ilang probinsiya.

Kamatuoran niini, misulay siya pagsulod sa politika pinaagi sa pagkandidato pagka-konsehal sa lungsod sa Manay sa miaging eleksiyon. Nagpakabana usab siya sa mga isyung politikal nga nakaapekto sa katilingban.

Sa buhi pa siya, aktibo siya sa social media diin niya gipadayag ang iyang mulo ug opinyon sa mga nahitabo sa ilang lungsod.

Gani, sa wala pa siya gipatay sa wala maila nga mamumuno, mikontak siya nako aron mangunsulta sa iyang giatubang nga kaso nga gipasaka sa iladong politiko.

Isip higala ug kauban sa civic organization, ako sab siyang gitambagan kung unsa ang angay nga himuon labot sa iyang kaso.

Pipila ka adlaw sa wa pa siya gipatay, nikontak na usab siya nako aron makigkita ug ihatag ang kopya sa iyang kaso nga buot niya nga mahatagan og pagtagad sa media. Apan tungod kay okupado kaayo si Donnie, wala na siya nakahigayon sa pagpakigkita nako dinhi sa siyudad.

Alang ni Donnie, ang iyang gihimo usa ka sakripisyo alang sa katawhan ug sa atong nasud, mao nga wala siyay kahadlok nga ibulgar ang kahiwian sa mga naa sa gahum sa gobyerno.

Sa iyang gihimo, wala niya igsapayan ang pagbutang sa risgo sa iyang kinabuhi tungod kay alang niya, kadto lamang ang paagi nga ipakita niya ang iyang pagmahal sa nasud.

Wala man kita nasayud kung kinsa ang mipatay niya, apan nanghinaut kita nga mahatag ra sa kaulahian ang hustisya sa iyang kamatayon.

***

Sakripisyo sa politiko ug mga tawo

Alang usab sa mga politiko, ang pagserbisyo sa katawhan maoy ilang tinguha mao nga sila nagsakripisyo sa grabe kalisud sa kampanya ug pagsaway sa mga kritiko.

Ug bisan hinay sila sa survey, padayon gihapon sila nga naningkamot nga modaug tungod kay ilang gipangga ang nasud.

Alang ngadto sa mga botante, hinaut nga magsakripisyo usab kita sa pagsusi sa maayong kalidad sa atong iboto nga mga kandidato.

Magsakripisyo unta kita sa pag-fact check sa mga isyu nga gikalambigitan sa mga kandidato. Di unta kita mag-agad lamang sa mga propaganda nga makita sa Tiktok ug uban pang social media sites. Kung ato kining mahimo, usa kini ka sakripisyo alang sa kaugmaon sa atong nasud.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph