MONTEVISTA, Davao de Oro -- Puwerteng pagbangotan sa inahan human nga iyang nakita ang bukog sa iyang anak nga giingong biktima sa summary execution sa mga teroristang grupo nga New People's Army (NPA).
Ning bag-o lang, uban sa militar ang inahan sa biktima nga si Reneboy M. Abiao, alyas Ka Oboy, kinsa gituohang gipatay sa mga kaubanang NPA.
Nakalot sa kasundalohan ang gilubngan sa biktima nga giingong miyembro sa NPA ubos sa Front Committee (FC) 33 sa hilit nga dapit sa Sitio San Agustin, Barangay New Calape, Montevista, Davao de Oro.
Ang nakubkob nga mga bukog, positibo nga giila sa inahan nga si Rose Tumanan sa Purok 4, Barangays Lebanon, Montevista.
Nagpamatuod sab ang usa ka Identification Card (ID) sa Hugpong Federal Movement of the Phils Inc. nga nakita uban sa gilubngan diin nakabutang ang ngalan sa biktima.