MATI CITY, Davao Oriental -- Tunga sa milyon ka pesos ang gitanyag nga reward money ni Mati City Mayor Michelle Nakpil Rabat, karong bag-o, sa bisan kinsa man nga makahatag og impormasyon ug makatudlo sa mipusil-patay kang Matiao Barangay Captain Ronnie Valera.
Si Valera gisulod sa wala pa mailhing mamumuno niadtong gabii sa Abril 13 samtang nagduyan sulod sa lawak sa ilang panimalay sa Purok Matahimik-1.
Wala na makabalos si Valera sa patraydor nga pagpusil kaniya gumikan sa igo sa iyang nahiaguman sa ulo. Nakuha gikan sa crime scene ang tulo ka basiyo sa bala sa kalibre .45 nga pistola. Narekober usab ang pusil nga gipanag-iyahan sa barangay kapitan duol sa iyang duyan.
Sumala ni Rabat, iyang nadesisyonan ang paghatag sa reward money aron mas madasig ang katawhan sa pagduol sa mga awtoridad ug paghatag sa impormasyon.
Ang tunga sa milyon ka pesos ihatag sa bisan kinsang makahatag og saktong impormasyon nga moresulta sa pag-ila o pagkadakop sa mipusil kang Valera.
Una nang gikondena ni Rabat ang pagpatay kang Valera nga iladong supporter niya.
Gikasubo kini sa mayora nga maoy unang maduguong hitabo sa dakbayan sa Mati atol sa eleksiyon. (Uban sa taho sa CIO-Mati)