Dili pasudlan ang mga simbahan dihang nagsugod ang pandemic niadtong Marso 2020, karon ang simbahan na maoy niduol sa iyang katawhan. Di sa pagsangyaw sa mga pulong sa Diyos, apan pagpaambit sa Iyang mga grasya.

Mao kini ang gibuhat sa parokya sa Christ of the Agony-Gethsemane isip ilang adjustment aron ilang makauban ug ikasandurot ang ilang mga parokyano sa panahon nga sila gikinahanglan kaayo, paghinumdom ni Fr. Junly Cortes, team member.

Busa niadtong Hunyo 14, 2020, kapistahan sa Corpus Christi, ang mga youth volunteer sa parokya nga dunay quarantine passes, nang-apud-apod sila og pinutos nga mga pagkaon ngadto sa kabataan sa matag balay sa tulo ka mga barangay nga ubos sa hurisdiksyon sa parokya.

Ang mga pagkaon gilangkuban sa spaghetti ug manok.

“It was our way of reaching out to the people at a time when people were not allowed to go to church,” matod ni Fr. Cortes.

Ang ilang gigamit sa pagpamalit sa mga sagol sa mga pagkaon nagagikan sa mga donasyon.

Kay wa man gitugot ang mga party sa birthday ug uban pang susamang mga kalihukan, ang budget alang niini nga mga kasaulogan gidonar ngadto sa feeding program sa parokya.

Bisan ang mga parokyano nga tua sa abroad ningpadala og mga donasyon alang sa feeding program.

Ang feeding program nga ginganlan og Kusina ni Juan, gitumong aron pagtabang sa katawhan panahon ning pandemic.

Gikan sa paghatod ngadto sa matag balay, gihimo na kini ngadto sa matag kapilya. Sa labing uwahi nga ihap, ang parish volunteers nakatukod na og 41 ka feeding stations sa tulo ka barangays.

Labing minos 5,000 ka mga bata ang nakapahimulos sa feeding matag semana.

Nag-usab usab ang menu gikan sa manok ug spaghetti, ngadto sa lugaw, pospas, champorado ug ube-porado. (REV gikan sa PR)