Manipis road sirad-an magabii human naigo sa landslide sa Lunes sa gabii, Abril 18, ug di buksan sa hingpit hangtod dili mahuman ang paghawan ang tanang nahibiling yuta nga nitabon sa dan.
Kini ang gitug-an ni Jonathan Tumulak, pangu sa City Traffic Operations and Development Authority (CT-TODA) nga nahinabi sa Superbalita Cebu ug nibutyag nga nagbutang na sila og mga traffic enforcer.
Ang CT-TODA, Talisay City Police Station ug uban pa nga mga ahensiya nagtagbo sa Martes uban ni Talisay City Mayor Gerald Anthony “Samsam” Gullas aron sulbaron ang problema sa dan sa Manipis.
Matud ni Tumulak nga kagahapon, Martes hangtod karong adlawa, Abril 20, pabiling maagian pa apan usa lang ka lane.
Sugod sa alas 6 karong gabii hangtod na sa alas 5:00 sa kaadlawon sa Huwebes, sirad-an na og balik.
Sa alas 5:00 sa kaadlawon hangtud na sa alas 6:00 sa gabii sa Huwebes, buksan kini apan usa ka lane ra gihapon ang paagian.
Giawhag ni Tumulak kadtong buot moagi sa dan Manipis nga likayan ang mga oras tiyempo sa pagsirado aron dili sila mahasol kay estrikto gyud nga dili paagian ang maong dan sa maong mga oras.
Samtang habig sa kapulisan, matud ni Police Lieutenant Colonel Randy Caballes, hepe sa kapulisan sa dakbayan, nga ang ilang partisipasyon mao ang pagpatrolya matag karon ug unya.
Apan kon mangayo og tabang ang taga CT-TODA kay dunay magpabadlong, ila dayon kining respondihan.
Niadtong pagkuso-kuso sa bagyong Agaton sugod sa Abril 8, gisirhan ang sityo Langoyon, mga 200 metros gikan sa dapit sa landslide karon human usab nag mudslide tungod sa way puas nga uwan.
Duna say mga motorista nga namugos sa pag-agi busa gipabantayan og pulis ang dapit.