Gisugakod ni Clinton Gualiza ang lapukon ug grabe ka lisod nga racetrack nunot sa pagbunok sa uwan aron pangulohan ang mga mananaog sa 22nd Lou Ornopia Motocross Cup ning bag-uhay lang sa MS Motosuit Motorsports Park sa Barangay Calambua, lungsod sa San Remigio, Cebu.
Si Gualiza, kinsa lumad nga taga Barangay Taptap, Cebu City, nakahipos og duha ka mga titulo gikan sa intermediate ug expert open divisions.
Miangkon sa ikaduhang puwesto sa intermediate category mao si Gelo Leonardo, kinsa lumad nga taga Ozamiz City ug apo sa mga tag-iya sa Medina College. Naangkon sab ni Leonardo ang ikatulong dapit sa expert division.
Nanghawod sa novice open mao si Gyle Aguilar samtang nagsunod kaniya mao si Inting Casinay. Mibawi si Casinay pinaagi sa pagsakmit sa titulo sa beginners open.
Ang ubang mga nakalabni og titulo mao sila si Julie Mae Cablao sa ladies division, Ayen Ledesma sa executives 40-44 ug 50-above age groups, Baden Ong sa executives 45-49 class, Boboy Geraldo sa veterans, Matt Velasquez sa 50cc, Carl Villahermosa sa 65cc, ug Dave Seblos sa elite.
Giangkon sa nagpasiugda sa lumba nga si MS Motosuit big boss Lou Ornopia nga siya naguol gumikan sa pagbunok sa uwan.
Apan dako ang kalipay ni Ornopia gumikan kay taliwala sa di maayong panahon, misugwak gihapon ang mga tumatan-aw.
“Naguol gyud ko nga giulan ang atong lumba apan sa gipakita sa bul-og sa mga tawo, dako kaayo ang akong kalipay kay atong napamatud-an ang walay paglubad nga suporta sa atong kaigsuonan nga riders ug dumodoong,” batbat ni Ornopia.
Tungod sa kalampusan, matod ni Ornopia nga mas nadasig siyang mopadayon sa pagpasiugda og motocross events nga sulod sab sa kapin sa duha ka mga tuig nga nahunong tungod sa pagkuyanap sa pandemya.
Nagsuporta sa 22nd Ornopia Cup mao sila si Andy Uy ug Hon. Annalyn Flores Tuling hasta ang Bantay Construction ni Myrna Rodrigo, Kapenarra ni Zenaida Cataquez, Zic Oil, N Style ni Nico Ornopia, JSUPT Felipe Montejo, SNR MBJ Motomaze Shop, F&FO Motor Parts ni Fiel Ornopia, Dinah RBS Construction and Supply ni Rosalina Sobrio, RMO Motor Parts ni Boy Ornopia, NF Enterprises ni Noli Ornopia, Olilab Oil, Inc., ug LMO Motor Parts and General Merchandise.