Paspas kaayong nakapanglimpyo sa mga basura ang mga kawani sa Dept. of Public Services (DPS) sa dapit sa South Road Properties (SRP) diin gipahigayon ang festival rally sa UniTeam kay ila kining natapos sulod lang sa upat ka oras.
Ang DPS nikolekta og unom ka mga truck nga basura sa SRP human sa rally nila ni presidential aspirant Ferdinand “Bongbong” Marcos Jr. ug iyang runningmate Sara Duterte-Carpio nga gitambungan sa 300,000 ka mga tawo.
Si Atty. John Jigo Dacua, department head sa DPS sa Cebu City Government, nagkanayon nga 250 ka mga personnel ang iyang gi-mobilize aron sa paglimpyo sa 2.9 hectares nga main venue, wa pay labot sa kasikbit nga luna diin nagtapok usab ang mga tawo.
Matod ni Dacua nga nagsugod sila og paglimpyo sa site alas 11 pa sa gabii diin aduna pay daghang mga tawo nga nagpabilin aron motan-aw ug maminaw sa concert.
Hingpit silang nahuman pasado alas 3 na sa kadlawon.
Duha ka garbage dumptrucks ug upat ka garbage compactor trucks ang basura nga ilang nakuha ug nahawan sa wala pa mosilang ang adlaw.
Dugang ni Dacua nga sagad sa basura mga plastic, empty plastic bottles ug uban pa.
MALINAWON
Gihulagway sa Cebu City Police Office nga malinawon ang rally.
“Peaceful, ang atoa ra gyud nga nahitabo kadtong lang mga nawagtangan og nga gadgets like cellphones and pitaka. Dili sad nato masulti nga nakuotan kay dili man sila maka identify kon gikuot but didto na sila sa sulod. We recorded mga upat ka insidente nga nag report,” butyag ni Police Lieutenant Colonel Wilbert Parilla, deputy director for operations sa CCCPO.
Nabantayan ni Parilla nga nianang buntag pa lang nagsugod na sa pagpangabot ang mga tawo gikan sa lain-laing lugar sa Sugbo.
Bisan sa kadaghan sa mga tawo wala makatala ang kapulisan og dakong problema gawas lang sa dunay nakuyapan nga kasagaran kanila edaran na.
Wala kini makaantos tungod sa kainit sa lugar bisan kon ilang gipahimutang duol sa Noah complex aron dali sila ma-monitor kon adunay maglisod sa pagginhawa.
Dali sila nga giatiman sa mga personnel sa naka-standby nga mga ambulansiya sa mga local government unit sa kalungsuran sa probinsya sa Sugbo.