Nanigbakay sa Panglao, nasikop

Duha ka mga lalaking hamtong nga mga residente sa lungsod sa Panglao, Bohol nagminghoy human sa kalipay nga nakalingkawas kaniadto sa ronda sa kapulisan sa tigbakayan kay sila gisikop.

Wa sila masayod nga gipasakaan sila og kaso sa korte ug nalutsan og warrants of arrest nga giluwatan ni Presiding Judge Raul Barbaron sa Municipal Trial Court in Cities (MTCC) sa lungsod sa Dauis.

Si Police Senior Master Sergeant Manuel Rabanal sa Panglao Police Station niila sa mga akusado nga sila si Lucio Egpalina Fellas, 55, taga Purok 6 ug Wilfredo Sebial, 52, taga Purok 2 sa Barangay Duljo sa maong lungsod.

Matud ni Rabanal nga buwag nga nadakpan ang duha. Si Fellas nadakpan alas 3:10 sa hapon sa Abril 19 samtang si Sebial nasikop alas 3:50 sa samang adlaw.

Ang duha pulos nag-atubang og mga kaso nga kalapasan sa Presidential Decree (PD) 1602 nga nagpahamtang og mas bug-at nga silot sa illegal gambling.

Nangu sa pagdakop mao si Lieutenant Amelito Meloria, hepe sa Panglao Police Station.

Ang hukmanan nitugot og piyansa nga P1,000 matag usa alang sa ilang temporaryong kagawasan.