Garcia: Alang E Manasakit, Tumiman Na Ka Mu (No one is Unhurt, Just Smile)

“AMPAT ing aldo mu asne kakaba

at ing bengi, ing bengi keka ya mu kabud

Nung makabitasa kang kinasna na kang bina king bye ini,

ay, kalawat ka mu, e mu paburean a mako ka.

Uling deng balang metung manangis.

Balang metung kikyak.

Balang metung manasakit pamisan-misan.

Misan ing segana-gana mali

Ngeni, penandit nang agnan-agnan magdalit

Ampat ing aldo mu magdili-dili king bengi

(kalawat ka, kalawat ka mu)

Nung pakiramdam mu bisa na kang kalabyus

(kalawat ka mu)

Nung king isip mu kinasna na ka king bye ayni,

kalawat ka mu.

Uling ding balang metung mangaplas

Mipasno ka karing kakaluguran

Balang metung manasakit

Mipasno ka karing kakaluguran

Balang metung mangaplas

E me babalugse ing gamat mu

Nung pakiramdam mu magdili-dili ka

Ali, ali, ali e ka magdili-dili.

Nung ika mung dili king bye ayni

Ding aldo at bengi mangakaba la

Nung aiisip mu kinapmu na kang tagana

king bye ayni, kalawat ka mu.

Aru, segana-gana mangaplas

Balang metung kikyak

Balang metung manasakit, pamisan-misan

At balang metung mangaplas neng misan

Kalawat ka mu, kalawat.

Kalawat ka mu, kalawat.

Kalawat ka mu, kalawat.

Balang metung mangaplas.

-- Michael Stipe, Bill Berry, Mike Mills, Peter Buck, REM, “Everybody Hurts”

“Tumiman ka agyang mangaplas ka pusu

Tumiman ka agyang mangaspak ya man

Ampat ating biga king banwa, milabas ka mu rin

Nung tumiman ka karing takut mu at lumbe

Tumiman ka at mekad bukas

Akit mung ing aldo sislag ya para keka.

Paslagan me ing lupa mu king saya,

Ipampan ing balang bakas ning lungkut,

Agya mang ing lwa malapit neng mabalag

Ita ing penandit a sukat kang sumibuk pa.

Tumiman, nanu ing gamit ning tangis?

Akit mung atin ne mang ulaga ing bye,

Nung tumiman ka mu pin.

Ita ing penandit sukat kang sumibuk pa mu rin

Tumiman, nanung ulaga ning pamanalugege?

Akit mung atin ya pa mu ring ulaga ing bye

Nung tumiman ka mu sana.”

-- John Turner, Geoffrey Parsons, Charles Chaplin

***

Agyang asna ka karagul sangkan bang bumye pa, daratang ing penandit a kukutnan mu ing sarili mu nung sukat ka pa mu ring kalawat king bye nu man anti kataram, nu man anti kaplas ing daralanan mu. Kakalawat ka pa mu rin. Mekad uling mikakunu ka king nung nanu tagana ing king sumangid nung dalakit na ka pin. Makatakut ing aldo kesa king bengi, ing aslag kesa king dalaumdum, ing ati ka king makapal a malda kesa keng magdili-dili ka mu.

Pasiknangan mu namu ing lub mu karing tigtigan. Karing kakaluguran a akakasabi mu. Balang penandit misasabi kayu paulagan mu uling akakalingwan mu ing kabilyan mu nung antita. Mipapasno ka agyang makananu mu, agyang kapurit mu. Agaganaka mung agyang makananu mu mangisnawa ka pa at atin ka pang malyaring daptan a makabaldugan. Atin ka pa mu rin palang ulaga agyang makananu mu, agyang asna karitak mu. Mikakasangkan ka pa bang migising ka pang pasibayu bukas agyang makananu mu.

Mananaman ka pa. Magsane ka pa at babatakan mu la pa ding katawan at isip. Mamasa ka pang mapilang aklat. Susulat ka pa. Gugulis ka pa. Kukudta ka pang dalit pamisan-misan. Kasi makasaup king pamangalingwan a ika makakalingwan na ka. Atin ka pa palang kabaldugan.

Tutu pin kaya ita? Makapikakunu. Akukutnan me ing sarili mu. Akukutang mu nung masalese ka pa pamisip. Nung e ka pa sira panimanman o nung atin pa o makatud pa ing gagawan mung pasya king balang bage at dake o dane ning pamibye-bye mu agyang makananu mu. Buri mu makapatiman ka pa karing aliwa, agyang asna kasakit tumiman king sarili mu.

Mangaplas ka man─kaylangan mu pa mu rin ing migising balang abak at tumiman karing akakatagmu mu. Mekad makapagpapasno ka karing kalupa mung mangaplas mu naman. Manasakit mu naman. Manamdaman mu naman.

O’t kaylangan mung magmalun. Atatandanan mu pa? E naman ing labwad ayni ing tune mung santungan, e wari? E mu kakalingwan ita.

***

Dake Talabaldugan:

milalakpus (pangdiwa) milalagpus, makalagpus/makalagpas, makatagal, matatagal, mumuna o makauna keng tatagalan. English – gets to overtake, leaving something or someone past behind. Alimbawa king pamangamit: “Panayan keng parati ing magtatau oneng parati ya naming darandaman ku gulisak potang milalakpus ne king bale mi.”

milalaksakan (pangdiwa) milalagsakan, milalagpakan, mipaglagsak, mipanibag, mipanyira. English – destroying or demolishing one another. Alimbawa king pamangamit: “Agnan lang migtagumpe king pamibye-bye ra dapot milalaksakan la ngeni pauli ning rirya king baling metung.” milalaktawan (pangdiwa) milalakton, milalagpusan, milalakpusan, mipanagal, mipupulanditan.

mipamulayan. English – getting to overtake each other. Alimbawa king pamangamit: “Makapangan yang alikabuk ing balang milalaktawan keng asna kabilis a pulandit nang Kikung bilis.”

milalakwan (pangdiwa) maglakwan, mitatagan, managan. English – leaving someone or something behind. Alimbawa king pamangamit: “Kabang lalabas ya ing gareta milalakwan yang ditak-ditak a pale a kapalut-palut pamu keng taldawa nanding abak.”

***

Mikasing-kabaldugang amanu tamu

malda – ding bibilug king kabalantyan, balayan o bangsa, ding lakwas marakal a bilang ding memalen o pati na mu naman karing kaladwan at aliwa pang bage nung bibilangan la.

laganas – ing sakup ning metung a dane, balayan, bangsa o ketawan. segana-gana – egana-gana mu naman karing aliwa; laganas o ding kayabe king malda o nanu mang bibilangan.

sabla – mengari kabaldugan king segana-gana, lakwas ya mu pin pangsikluban.

kerakalan – misusulat o masasambitla anting kerak’lan mu naman.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph