Nakanselar ang title defense ni World Boxing Organization (WBO) bantamweight champion Filipino Johnriel Casimero batok kang Englishman Paul Butler nga gikatakda na unta karong Abril 22, 2022 sa Liverpool, England, taho sa RingTV.
Kini gumikan kay nakasupak si Casimero sa medical guidelines sa British Boxing Board of Control (BBBofC) human kini nagpa-sauna aron maus-osan ang iyang timbang, pipila ka mga adlaw sa dili pa ang away.
Basi sa lagda sa BBBofC, estriktong gidili ang paggamit og sauna aron magpaubos og timbang hinungdan nga wala motugot ang ahensiya nga ipadayon ang away.
Gitataw sa BBBofC nga aduna sila’y nakuhang lig-ong mga ebidensiya nga gibuhat kini sa gitawag og “Quadro Alas”.
Sa pagkawagtang na ni Casimero, laing Pinoy ang moaway, apan sa interim bantamweight title bout, batok kang Butler.
Matod sa GMA News online, si Jonas Sultan mao ang mohulip kang Casimero, kutlo niini sa pahibawo sa WBO.
“The British Boxing Board of Control has been made aware (with supporting evidence) that Mr. Casimero has made use of a sauna in close proximity to his World Boxing Organization championship contest on 22nd April 2022 in Liverpool,” pamahayag ni BBBoC general secretary Robert Smith.
“As you are aware, this is against BBBoC’s medical guidelines, and therefore we can’t permit him to compete in the proposed contest on Friday.”
Nakugang sila kay sa tulo lang ka adlaw, 10 lbs. na ang gius-us sa timbang ni Casimero.