Human sa duha ka mga tuig nga pagkahunong tungod sa pagkuyanap sa pandemya, mobalik na karong tuiga ang mga aksiyon sa Cebu Schools Athletic Foundation Inc. (CESAFI), ang nag-unang school-based sports competition sa Visayas ug Mindanao.
Pinaagi sa usa ka press conference, opisyal nga gilusad ang 2022 season sa kompetisiyon sa Parklane Hotel kagahapon, Abril 20, 2022.
Ang opisyal nga opening ceremony sa bag-ong season ipahigayon karong Abril 22, 2022 sa Cebu Coliseum.
Hinuon giklaro ni Commissioner Felix Tiukinhoy nga dili pa gyud regular ang mga kombati ug nagpili lang sila og 13 ka events nga dali ra’ng mausab ang patakaran aron mahisubay gihapon sa safety protocols batok sa Covid-19.
Apan bisan pa niini, gitataw ni Tiukinhoy nga nagpanikad lang gihapon ang kadagkuan sa Cesafi nga mabalik na ang kompetisyon.
“The board of directors of CESAFI are very excited. We really tried to see it that we can open the 2022 season,” pasabot ni Tiukinhoy.
Ang events nga kombatihan ning higayuna mao ang athletics, badminton, basketball, beach volleyball, chess, dancesports, football, karatedo, scrabble, table tennis, taekwondo, tennis ug ang bag-ong E-Sports.