Ang Philippine Coast Guard (PCG) niumol na og team nga mohimo og imbestigasyon kalabot sa pagkasunog niadtong Dominggo, Abril 17, sa M/v General Romulo cargo vessel nga gipanag-iya sa Lorenzo Shipping Corporation nga nakabase sa kaulohan.
Mao kini ang gibutyag ni ni LTJG. Krysta Bergantin, tigpamaba sa PCG Cebu.
“On going na ang investigation kay ang PCG nag convene naman og Marine Casualty Investigation (MCI) nga maoy moimbestiga niini...” matod ni Bergantin.
Dugang ni Bergantin nga usa sa himoan og basehan sa PCG mao ang kon unsay unod sa Marine Protest nga gipasa sa kapitan ngadto na sa sub station sa PCG Naga.
Mohatag ra ang PCG sa resulta sa imbestigasyon niini kon unsay mogawas sa imbestigasyon nga gitawag og MCI.
Sa kasamtangan ang barko nga M/V General Romulo nag habwa og tubig gikan sa sulod sa barko kay nasudlan kini og tubig atol sa pagpawong sa kayo.
Sa inisyal nga impormasyon nga niabot sa PCG, giingong dunay gitrabaho ang pipila ka mga crew sa maong barko dihang kalit lang nga misilaob ug maoy rason nga naigo ang chief engineer nga si Nelson Polvorosa, 62, nga maoy hinungdan nga natagak siya gikan sa taas sa barko ug maoy hinungdan sa iyang kamatayon.
Ang barko dunay 22 ka mga tripolante.