Mga bata, dunay kabilinggan sa panglawas ug tiguwang, dili patambungon sa gipaabot nga dakong rally sa Leni Robredo-Kiko Pangilinan tandem sa North Reclation Area sa dakbayan sa Mandaue karong adlawa, Abril 21.
Kini ang panawagan ni Police Lieutenant Colonel Franco Rodulf Oriol, tigpamaba sa Mandaue City Police Office (MCPO), kay risgo alang kanila ang pagtambong sa dakong panagtapok.
“We are expecting 250,000 supporters sa Leni/Kiko rally kay mao mana ang ilang estimate sa crowd sa venue. Mao na nga aron malikayan ang disgrasya, mas maayo nga dili nalang dalhon ang mga bata ug moadto ang mga tiguwang,” matod ni Oriol.
Matud ni Oriol, ang MCPO mopakatap og personnel moabot na sa dul-an 400 ka mga pulis samtang siyam ka sundawo, upat ka mga sakop sa bombero ug duha ka fire trucks, 100 ka mga sakop sa Team ug 50 ka barangay tanod, apil na ang mga personnel sa disaster.
“More or less naa ta sa more or less 600 ka mga personnel tanan ang pwersa nga mobantay sa kahapsay ug kalinaw sa maong rally,” dugang ni Oriol.
Gilauman nga magsugod ang kalihukan sa alas 3:00 sa hapon ug motapos sa alas 12:00 sa tungang gabii.
Samtang, nauyonan sa organizers sa Leni-Kiko rally, PNP Team, AFP, ug City Disaster Risk Reduction Management Office (CDRRMO) nga sugod sa alas 8:00 sa buntag karon, Abril 21, ang dalan Ouano dili na paagian og mga dagkong sakyanan lakip na ang mga public utility bus.
Gidili na usab ang pagdala og mga dagkong bag, mga ilimnon nga makahubog ug sigarilyo sa sulod kon asa himuon ang rally apil na ang mahait nga hinagiban.
Dugang ni Oriol nga subay sa nauyonan sa tigom nga way sirad-an nga mga dalan sa siyudad apan gipaabot gyud ang kahuot sa dagan sa trapiko, rason nga dili lang una paagian og mga dagkong truck ang mga dalan nga duol sa himuong rally.
“Mao na ang among hangyo sa mga dunay mga sakyanan nga mangita lang una og mga laing agianan nga layo ra kon asa ang rally,” dugang ni Oriol sa Superbalita Cebu.
Ang dan Ouano kon asa himuon ang rally paagian ra hinuon apan kini ngadto sa gagmay nga mga sakyanan lang.
Ang grupo ni Bise Presindente Leni Robredo magagikan sa dakbayan sa Danao una moabot sa lugar sa Mandaue kon asa himuon ang dakong rally sa alas 6:00 karong gabii.