Wala ka ba mahibong nganong pirme magbaha sa mga gwapa ang courtside sa PBA Governors’ Cup Finals tali sa gikahinamang Barangay Ginebra San Miguel vs. Meralco Bolts? Nan sila ang gitawag sa PBA og “Wags” (wife and girlfriends) nga lunod-patay ang suporta basta dunay duwa ang ilang mga partner. Ila-ilaha kon kinsa sa mga PBA star sa Barangay Ginebra ug Meralco ang palarang nakapangasawa o engaged og beauty queen na, cheerleader pa! Gi-neb-ra! Gi-neb-ra!

JAPETH AGUILAR UG CASSANDRA NAIDAS / INSTAGRAM

Si Cassandra Naidas ang kanhi Bb. Pilipinas candidate ug 2015 Miss World Philippines first runner-up. Ang 5’10” towering beauty nagduwa usab og basketball sa high school varsity team sa Assumption Antipolo ug nag-train sa La Salle women’s team. Si Cass ug Japeth Aguilar nakasal sa civil Oktubre 2019. Gi-welcome nila ang una nilang liwat Pebrero karong tuiga.

SCOTTIE THOMPSON UG JINKY SERRANO / NICE PRINT PHOTO INSTAGRAM

Nag-viral ang ilang kasal kay dili ang long-time girlfriend ug fianceé ang gipakaslan kundi ang bag-ong kaplag. Si Scottie Thompson ug Jinky Serrano unang gikasal June 2021 ug gisundan pa sa beach wedding niadtong December. Ang kanhi flight attendant ug beauty clinic owner naila isip Miss Teen Philippines Int’l-Central Luzon ug Mutya ng Mabalacat.

ALJON MARIANO UG KAYESHA CHUA / INSTAGRAM

Si Kayesha Chua ang Miss Bicolandia 2017 ug kanhi kandidata sa Binibining Pilipinas 2018 ug Miss World Philippines 2019. Niadtong Pebrero 27, 2021 na-engaged siya kang Aljon Mariano, ang small/power forward sa Brgy. Ginebra. Ang duha dugay nang uyab sa kolehiyo pa sa dihang nagduwa pa si Mariano sa UST Growling Tigers.

ARVIN TOLENTINO UG BRANDY KRAMER / INSTAGRAM

Si Brandy Kramer mao ang gwapang manghod sa retired PBA player Doug Kramer. Si Brandy kanhi varsity player sa volleyball sa San Beda sa wa pa nahimong flight attendant sa AirAsia. Si Kramer ug Ginebra forward Arvin Tolentino nakasal July 2020 human sa unom ka tuig nilang panag-uyab. Kauban sa hulagway ang una nilang baby nga natawo niadtong September 2021.

LA TENORIO UG CHESCA BUGIA / INSTAGRAM

Di man certified beauty queen apan gwapa sab ang kapikas ni `Ginebra El Kapitan.’ Nahimamat ni LA Tenorio ang iyang asawa sa dihang nagduwa pa siya sa kolehiyo. Si Chesca Bugia igsuon sa kanhi teammate ni LA sa Ateneo nga maoy nagsilbi nilang tulay. Nakasal sila niadtong 2010. Kauban sa hulagway ang upat nila ka mga chikiting.

CHRIS BANCHERO UG JUSTIN RUTH GASCON / INSTAGRAM

Si Justin Ruth Gascon ang mestisang sweetheart ni Chris Banchero, ang American-born ug Italian-Filipino PBA player nga nagduwa sa Meralco Bolts isip point guard. Si Gascon kanhi kandidata sa Binibining Pilipinas International 2011. Kauban nila sa hulagway ang otso anyos nilang anak.