HUMAN na, suma pa, ang eleksyon ug proklamasyon na lang ang gihuwat. Kini ang gisaysay ni Merla Gregori, 45-anyos nga taga Barangay Paciano Bangoy, Agdao District, Davao City sa dihang gidugok sa daghang mga BBM-Sara supporters ang natigayong campaign rally sa City de Mare, Filinvest Grounds, South Road Properties, Cebu City niadtong Lunes, Abril 18, 2022.
"Daug na, di na gyod mabangbang, kung itandi sa pikas diha sa ihap sa mga tawo sa ilang rally, wa ra ig-one fourth," ingon ni Merla sa Superbalita Miyerkules.
Gibutyag sab sa usa ka traysikol drayber sa Agdao Public Market nga si Adolfo Valenzona nga human na sab kuno ang eleksyon alang niya human nga di maapsan sa mga kaatbang nila BBM-Sara ang gidaghanon sa mga supporters.
"Klaro na, silang duha [BBM-Sara] ang sunod modala sa panggobyerno sa Pilipinas, ug unta una nilang matagad ang kung paunsa manginabuhi ang tawo luyo niining pandemya," ingon ni Adolfo.
Sumala sa organizer sa maong event, nag-awas-awas ang suportang gipakita sa mga Cebuano sa tandem nilang presidential frontrunner Ferdinand "Bongbong" Marcos Jr. ug runningmate niini nga si Inday Sara Duterte diin subay sa ilang bana-bana, mikabat sa kapin 300,000 ang ihap sa mga tawo nga nakiglambigit sa programa sa UniTeam sa Cebu niadtong Lunes.
Gikompirma sa mga organizer nga naa sa 300,000 ka tawo ang misulod sa 30 ka ektaryang luna sa Filinvest Grounds, idugang matud pa ang mga naa sa palibot nga dili na makasulod.
"Gibana-bana namo nga 300 tawsan ang nitambong sa rally kay mao man kini ang kapasidad sa lugar, 30 ka ektarya man gud ang giluagon sa area, kay puno sa mga tawo, seguradong naa sa 300 tawsan ang ihap niini gawas pa niana duna pay mga tawo sa kalsada, busa seguradong sobra sa 300 tawsan ang mga mitambong," matud sa usa sa mga organizer.
Giseguro usab ni Gobernador Gwendolyn Garcia ang maong ihap gumikan kon sundon ang Matimatika, sa 30 ka ektaryang giluagon sa luna, mokabat sa kapin 300 tawsan ang ihap sa mga mitambong.
"Kon atong sundon ang Math, ang luna 30 ka ektarya, mokabat sa 300 tawsan ka mga tawo ang mitambong karon," matud pa ni Garcia.
Una pa miistorya silang Marcos ug Duterte, gisugat na sila sa kusog nga mga singgit, "Daug na!" singgit sa mga BBM-Sara supporters sa Cebu.
Matud ni Marcos, ang rally nila sa Cebu ang dunay pinakadaghang ihap sa mga mitambong sa tanang kampanya nga ilang gipahigayon.
Nipatigbabaw usab ang daw sama sa pista nga tema sa programa tungod sa mga misayaw og "Sinulog" nga iladong festival sa tibuok lalawigan sa Cebu.