TINGUHA sa lokal nga panggamhanan sa Davao City nga ibalik ang kabibo sa kasaulogan sa Kadayawan sa Dabaw kay himuon na kini nga face-to-face karong tuiga tungod sa padayong pagluag sa restriksiyon sa Covid-19.
"We're really planning to hold the event face-to-face," butyag ni City Tourism Operations Office (CTOO) Head Generose Tecson atol sa Armed Forces of the Philippines-Philippine National Police (AFP-PNP) Press Conference Miyerkules sa buntag, Abril 20, 2022.
Hinuon, kabahin sa pila ka adlaw, matud niya nga wala pa kini mahisguti sa mga tigpasiugda. Apan gisulti niya nga posibleng pakubsan kini ngadto sa usa ka semana.
Niadtong 2019, ang lokal nga panggamhanan gilugwayan sa siyudad ang selebrasyon sa Kadayawan sa tibuok bulan.
Apil sa mga kalihukan nga ibalik sa kasaulogan karong tuiga mao ang Indak-Indak sa Kadalanan, Pitik Kadayawan, ug Pamulak sa Kadayawan.
Ablihan sab og balik ang Tribal Village sa Magsaysay Park ngadto sa publiko.
Hinuon, gisulti ni Tecson nga mga tigpasiugdan naghuwat na lang sa executive order aron nga makahunat na sila sa ilang pagpangandam alang sa tinuig nga kasaulogan.
Ang Kadayawan, tinuig nga pangilin sa siyudad sugod niadtong 1986, gihimong "virtual" na lang ang pagsaulog niadtong 2020 ug 2021 tungod sa pagtaas sa mga kaso sa Covid-19.
Ang selebrasyon sab sa Araw ng Dabaw, ang anibersaryo sa siyudad sa kamugnaan niini, apektado sab sa pandemya, miresulta nga himuon sab kini sa digital.
Apan mga restriksiyon sa pagtapok, naglakip sa miting, insentibo, konperensiya, ug exhibitions nga mga kalihukan gilibkas na tungod kay ang siyudad mikambyo na ngadto sa mas luag nga Alert Level 1 tungod sa padayong pagtiurok sa sa mga kaso sa Covid-19 dala sa daghang ihap sa nabakunahan na.