Doble ang good news alang sa mga Sugboanon.
Ang una, buksan na ang dugay nang gikahinaman nga Cebu Cordova Link Expressway (CCLEX).
Si Presidente Rodrigo Duterte mao ang mangu sa opening ceremony sa Abril 27, 2022 sa 8.9-kilometrong taytayan nga nagdugtong sa Cordova ug dakbayan sa Sugbo.
Mao kini ang labing taas nga taytayan sa Pilipinas sa pagkakaron.
Ang ikaduhang good news mao nga ang mga motorsiklo nga 125cc ngadto sa 399cc tugtan nga makaagi, apan sa Hulyo pa makasugod, pahibawo sa Cebu Cordova Link Expressway Corporation (CCLEC) sa ilang opisyal nga pamahayag sa Abril 20, 2022.
Ang CCLEX Bridge Management Board nipasar og resolution nga nagtugot sa mga motorsiklo nga 125cc-399c.
Matod sa CCLEX, ang pagbukas natakdo usab sa makasaysayanong petsa nga mao ang 501st nga paghandom sa Kadaugan sa Mactan nga nagtimaan sa kadaugan ni Lapulapu batok sa mga Katsila nga gipangulohan ni Portuguese explorer Ferdinand Magellan.
“We are happy and honored to have come to this point, opening the biggest infrastructure project in this part of the country,” matod ni Metro Pacific Tollways Corporation (MPTC) Chairman Manuel V. Pangilinan. “We thank President Duterte for honoring us by being part of this historic event.”
Ang proyekto gipasiugdahan tali sa lokal nga kagamhanan sa Dakbayan sa Sugbo ug Lungsod sa Cordova uban sa MPTC pinaagi sa public-private partnership nga giaprobahan usab sa administrasyon ni anhing Presidente Benigno Aquino III.
Gipahigayon ang groundbreaking sa proyekto, giisip nga “engineering marvel,” sa Marso 2, 2017.
Gisugdan ang pagtrabaho sa Hulyo 5, 2018, uban sa seremonyas nga nagtimaan sa pagsugod sa civil works.
Mogamit ang CCLEX og all-electronic toll collection system, apan sa Hunyo 2022 pa hingpit sugdan aron paghatag og igong higayon sa mga motorista nga makapataud sa RFID sticker sa sakyanan.
Modawat una og cash nga bayad sa kasamtangan.
MOTORSIKLO
Tungod sa lapad nga panawagan sa mga tigmotorsiklo, nahukman sa bridge management nga tugtan ang mga motorsiklo nga makaagi sa taytayan, matod ni CCLEC president ug general manager Allan Alfon.
Ila sab nga nasuta ang kadaghan sa mga motorsiklong narehistro sa Land Transportation Office (LTO) ug andam mobayad ang mga drayber sa toll fee base sa pagtuon sa University of San Carlos-Center for Social Research and Education.
Magtakda pa sila og petsa kanus-a sugdan ang online registration sa pagpang install sa RFID stickers sa mga motorsiklo nga 125cc-399cc.
“We encourage motorists to have the CCLEX RFID installed on their vehicles, including motorcycles, in preparation for the electronic and automated toll collection by June,” matod ni Alfon.