NAG-UNANG suspek sa pagtulis ug pag-abis sa dila sa usa ka drayber sa taxi niadtong Martes Santo, Abril 12, sa gabii sa Barangay San Isidro sa lungsod sa San Fernando, nadakpan sa mga sakop sa Talisay City Police Station sa Miyerkules sa gabii, Abril 20, walo ka adlaw gikan sa hitabo.
Apan ang pagkadakop sa suspek pinasikad sa duha ka warrants of arrest nga giluwatan sa korte sa kaso nga pagpatay sa dakbayan sa Tagbilaran, Bohol ug robbery sa dakbayan sa Carcar sa Probinsiya sa Sugbo.
Si Police Lieutenant Colonel Randy Caballes, hepe sa Talisay City Police Station, nibutyag sa mga sakop sa media nga ang pagdakop sa suspek usa ka hiniusa nga operasyon uban ang San Fernando Police Station ug Bohol Provincial Police Office (BPP0).
Ang suspek mao si Alexander Rematado, 30, ug molupyo sa Barangay Maguikay, dakbayan sa Mandaue, apan duna usab siyay pinuy-anan sa San Fernando ug dakbayan sa Carcar.
Ang suspek gidakop pinasikad sa duha ka mga warrant of arrest sa kasong murder nga giluwatan ni Judge Jennifer Chavez Marcos sa Regional Trial Court (RTC) Branch 2 sa Tagbilaran City pinitsahan niadtong buwan sa Pebrero 2019 nga walay piyansa nga gitugot. Ang krimen sa pagpatay nahitabo niadtong 2017.
Laing kaso ang giatubang ni Rematado sa dakbayan sa Carcar nga usa ka robbery nga nahitabo niadtong 2013. Ang alias warrant of arrest batok kang Rematado giluwatan ni Judge Sylva Aguirre Paderanga niadtong Disyembre 2013.
Dugang ni Caballes nga nadakpan si Rematado sa alas 11:00 sa gabii sa Miyerkules sa gabii, Abril 19, 2022.
Ang suspek gidakop sa iyang giabangan nga apartment sa Barangay Maguikay, dakbayan sa Mandaue.
Moabot sa lima ka adlaw nga gisubay sa kapulisan sa dakbayan sa Talisay ug lungsod sa San Fernando si Rematado hangtud nga iyang natultulan kon asa nag puyo ug gi-serve ang warrant of arrest sa suspek.
Samtang, si Police Major Efren Diaz Jr., hepe sa San Fernando Police Station nagkanayon, “Among gipakita sa rogues gallery namo, among gipatan-aw ang biktima ug didto niini iyang nailhan ang usa sa mga
nagtulis kaniya kining atong nadakpan nga si Rematado,”matod ni Diaz.
Ang biktima nga si Andres Alfante, dihang niabot sa Talisay City Police Station, gipangutana sa Superbalita Cebu, parte kang Rematado nga usa sa mga ningtulis kaniya.
Ang anak sa biktima nga wala na magpangalan nga maoy nitubag habig sa iyang amahan tungod kay hinay ang iyang pag tubag, niingon nga ang sakay sa likod maoy nag-abis sa dila sa iyang amahan samtang kining nadakpan maoy sakay sa atubangan sa taxi nga maoy nagkupot usab aron dili makalihok ug nanion og armas.
Nailhan siya ni Rematado kay iyang gihukas ang kawo ug duna sab siyay patik.
Si Rematado nga gikuhaan sa iyang tubag, nihimakak nga siya ang suspek kay niadtong tungora Martes Santo.
“Inosente ko ana, Sir, kay nag-duty man ko ana sa akong gitrabahoan niadtong tungora,” matod sa ni Rematado.
Ang San Fernando Police Station maoy mopasaka og kaso batok kang Rematado. Kini mao ang robbery with serious physical injury.
Ang kauban ni Rematado padayon pa nga gipangita sa kapulisan.
Samtang, ang kapulisan sa siyudad sa Sugbo makig-alayon sa Talisay Police Station.
Matod ni Police Lieutenant Colonel Wilbert Parilla, deputy director for operations sa Cebu City Police Office (CCPO), usa sa ilang subayon kon si Rematado mao ba usab ang nangtulis sa mga taxi sa dakbayan sa Sugbo.
Dili pa makabutyag si Parilla nga kadtong tulis sa taxi driver sa Barangay Lahug niadtong Huwebes Santo, Abril 14, 2022 diin ang biktima human tulisa, gidunggab pa, siya ba.
Gitulis si Edwin Abastillas, 52, drayber sa Unit Modern Trans nga taga Lipata, lungsod sa Minglanilla.
Gidala pa sa tulisan ang iyang unit apan pagka alas 4:20 sa hapon sa samang adlaw, napalgan ang taxi ni Abastillas nga giabandonar sa Fulton St., Barangay Apas, siyudad sa Sugbo. (BBT/AYB)