CAMP QUINTIN MERECIDO, Catitipan -- Nakatakdang mopasaka na og kaso ang awtoridad batok sa giingong suspek sa pagpusil-patay sa usa ka political vlogger nga si Danilo Lumikid.
Atol sa gihimong send-off ceremony kagahapon sa buntag, Abril 22, sa Protective Security Personnel sa Police Regional Office (PRO) Davao Region Headquarters sa Camp Quintin M. Merecido, giingon ni PRO-Davao Director Benjamin Silo nga ipasaka na sa kapulisan ang kasong murder.
Si Lumikid gipusil samtang nagmaneho sa iyang motor niadtong April 1, 2022.
Nakita ang dagway sa mga suspek base sa gipagawas sa kapulisan nga kopya sa CCTV footage sa mga persons of interest sa kaso.
Dungan niini, gibutyag sab ni Silo nga sa dili pa mahuman ang bulan sa Abril mapasaka na sab ang kaso batok sa mga mipatay kang Kapitan Ronnie Valera sa Barangay Matiao, Mati City niadtong Abril 13, 2022.
Una nang gipahibalo nga mohatag og dagkong ganti nga salapi si Mati City Mayor Michelle Nakpil Rabat sa kung kinsa man ang makatudlo sa nagpusil-patay sa kapitan.