NAKASUWAY ka na ba nga nadugay ang pagduaw sa imong buwanong bisita?
Usahay maabtan og 2-3 ka buwan unya inig abot mabalaka o mahadlok ka kay subra ka kusog unya mag apul-apol. Usahay sab subra ka hinay o pudyotpudyot ang pagtulo.
Ang uban makasinati og ‘hot flushes’ kun pagpamati og kainit sa nawong parisan og pagpaningot og bugnaw nga kasagarang mahitabo sa gabii.
Duna say uban nga kanunay magsakit ang ulo, magpanlipong o paspas ang pinitik sa pulso (palpitate).
Ang uban sab magkalisod o putolputol ang pagkatulog sama sa insomnia. Ang resulta ma saputon o dali ra nga masuko unya maglisod og concentrate.
Ang buhok sab magkaanam na og kanipis unya daling mangalarot samtang ang panit mag-uga na bisag unsa pa nga lotion ang gamiton.
Kon ang babaye motungtong na sa 40 anyos pataas, senyalis na kini nga naa na sa perimenopause.
Matod ni Dra. Carol Taruc, kining mga komon nga mga simtomas maoy masinati sa babaye sulod sa 5-6 ka tuig una mag menopause.
Maingon nga kitang mga babaye nag-menopause na ka kon di na ta dug-on sulod sa usa ka tuig.
Lainlain ang edad kon mag menopause. Ang kasagaran subra 50 apan dunay uban nga sayo magsugod (42 anyos hangtod na 49).
Kining mosunod maoy kasagarang isyu kon mag menopause na: sakitsakit sa kasingkasing, osteoporosis (pagnipis sa kabukugan nga maoy maka-ingon sa daling pagkabali), Atropic Vaginitis kun ang pagnipis sa lining sa kinatawo maong sakit na kon makighilawas, urinary incontinence o ang di mapugngan nga pag-ihi kay nipis naman ang urethra kun agianan sa ihi.
Dunay mga alibyo nga makatabang ini sama sa HRT (Hormone Replacement Therapy) nga imnon o cream nga ipahid sa kinatawo, pag-inum og gatas, tumar og Calcium 1,000-1,500 mg ug Bitamina D nga 400-800 IU kada adlaw.
Puno nga pahimangno ni Dra. Taruc ang paghinayhinay og inum sa calcium kay maka-porma sab kini og bato sa kidney.
Way makapilde sa inadlaw nga paglakaw (mga 30 minutos), ehersisyo og pagkaon og balansi.