“O Ginu ku, kapilan la mipalamutyan ding kanakung mata king lwa
ning lugud a tutulung parati kabang gagale ku la ring Banal Mung Lagyu?
Kapilan ya mabaknal ing kanakung siwala, at kapilan ing bwak
king katawan ku talakad king punta king pamanungge ku king Lagyu Mu?
O Ginu! Panamdaman ku ing pangakawani Mu,
tuturing kung ing penandit anting labing-adwang banwa o migit pa.
Ing lwa tutulu karing mata ku anting bulus ning uran,
at daramdaman kung ala kung kalalamlaman king pangakawani mu.
Ala kung balung aliwa nung e i Krisna anting kanakung Ginu,
at mandatila Yang antita agya mang talanan na kung asna kagaspang
king Kayang kaul o gagawan na kung aspak pusu
kapamilatan ning kayalan Na king arap ku.
Lubusan yang malaya nanu man ing sablang daptan Na kanaku,
uling Ya ing kanakung kasamba-sambang Ginu, alang nanu mang kapalit.”
~ Kanam anggang kawalu karing Walung Dalangin nang Ginung Gauranga
***
Masanting ing parati kayung miyabe ning pakamalan mung tau. Pidarakayan yu la ring balang penandit king saya at lumbe, kanawan o kasakitan, king kasaplalan o kasakitan.Apisasabi yu ing nanu mang bage masakit man o mayan mu. Lakwas yung apipisulu ing nanu mang yapag na ning bye kekayung adwa.
Makanyan man, ating sumangid ita. E parati namu miyayabe kayu, at datang at datang mu rin ing pamikawani pauli ning pamandayu mu o pamandayu na king nanu mang sangkan atin kayu.
Malungkut ing pamikandayu. Maplas king pusu ing agwat. Mekad e mu man paulagan ing sablang penandit a pisulu yu anting mipalsinta kanitang makabang panaun a pisusulwan yu pa ing sablang penandit. E mu ikit ing tune ulaga ning pakamalan mu. E mu pesayangnan. E mu pikabyan agyang ditak mu.
Kanita, agyang kisnang tula at sagakgak ayli ing balang aldo piyabe yu, e mu man nanamnaman ing nyaman da reti. Ing yumu meging pangkaraniwan namu inya e mu na paulagan. Bala mu e na magisan. Bala mu e na mabating pa.
Ngeni, babalikbalikdan mu ngan dapot balu mung e na mibalik agyang kapirasung penandit a pisulu yu uling mikandayu na kayu at e mu balu nung mikit kayu pa. Malapad na ing agwat. Dake na namu ning malaut a milabas ing sablang panalala yu. Panalala na mu at ati namu king isip mung kisnang pagal at pusu mung melamug na king kaplas pauli ning kelang masabal mu naman king panamdam ning kaluguran mu.
Adaramdam ing lalam ning lugud at bayat ning lugud king kamalitan a e mu ne akit pasibayu ing kekang pakamalan, ing e na kayu mitagmu mata at mitagklilan ambisna puntang taliri mu man. E na la mituliran pang pasibayu ding kekayung mata kapilan man.
Ngeni mu panamdaman matikdi king pusu mu ing yumu ning lugud. Ngeni ka sisisi at pilalasan mu na mu ing balang lwa mung tutulu king lupa mung sadya pagumasdan na kabang mipaniman kayu. Ngening mikawani na kayu. Ngening balu mung e na kayu mikit pang pasibayu. Kapilan man. Angga man king alang-angga.
Lakwas m’ya mung paniglon. Lakwas m’ya mung panalumduman nu ka man munta. Lakwas m’ya mung pantunan nu man karin. Nanu mang penandit.
***
Patagal a Maligayang Aldobeytan karing adwang maulagang babai king bye ku?Caela Azalea Torres Garcia at king payntungul a Pamuntuk Bangsa Maria Leonora “Leni” Gerona Robredo king keyang ka-57ng banwa napun, Abril 23.
Pagnasan ning Kapisik ing kekayung kisnang tagumpe, kalam at mipnung ligayang bye keti king yatung iti.
***
Dake Talabaldugan:
milalala (pangdiwa) gagawang dase, imalan o aliwa pang gamit kapamilatan ning masalese pamisalit-salit ding sinulad, o pati na kapirasu ding piglating dake ding tanaman o deng tangke at impugn mu naman. English – someone weaving a textile, cloth, tapestry or something else. Alimbawa king pamangamit: “Nandin ya pa milalala ing dalaga king pengayas a balat palasan bang makagawa yang buslu.”
milalalak (pangdiwa) mibibilak, misasalampak, mikaka-agwat. English – spreading or parting of two naturally entwined things too much. Alimbawa king pamangamit: “Inya pala masasakang la reng bingut uling milalalak lang labis keng pamamusan da reng maningat karela.”
milalalu (panguri) lalabis, mipapalalu, lakwas misusubi, bibinang labis, lalagpus king sukat o dapat mu. English – going over the limit; getting or becoming too much; becoming excessive. Alimbawa king pamangamit: “Milalalu na nung pipaten ta pang mikakaluguran ing alang ulagang bage anti king pulitika.”
milalamakan (pangdiwa) midirinan o mipagkaluban lamak. English – someone being given a gift. Alimbawa king pamangamit: “Mengari na mu naming milalamakan ya ing baintau neng parating neng pagkalubang belwan ning kasiping dang bale king kangatbang ilug.”
milalalam (pangdiwa) miraras o mikakabit keng lalam o sulip; mipapaylalam. English – someone or something that is being put under. Alimbawa king pamangamit: “Milalalam ya ing lagyu nang Poldu inya miras yang patingapun makapila keng pamangwa nang payntulut makapanambak keng lele dang bakud a asna katas.”
***
MIKASING-KABALDUGANG AMANU TAMU
aspak – maliyaring sira o kasiran kareng balbalin a kasangkapan, salami, kuran, sula; manibatan o maging bunga ning ning labis a pali o labis a dimla kareng bage o agyang karing dake ning katawan ding mabibye tau o aliwang kaladwan.
lamat – bagya o malating panimulan ning aspak a e na malyaring larinan pa kabud milyari na; magagamit mu naman king tiwala, pamiyutus o kapanaligan.
balbal – lubus a kapalyaryan kaybat ning lamat o aspak, dapot pekabage amanu karing masisirang salamin, basu, tasa, kuran o aliwa pang kasangkapan.
punti – malating lamat a malilyari karing kasangkapan at pati na karing dake ning katawan ning tau, anti kareng ipan, kuku o pati na butul.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.