Double blackeye ang nahitabo sa Philippine boxing ning semanahona.
Human gikataho nga yanong gitangtangan sa iyang World Boxing Organization (WBO) bantamweight title si Johnreil Casimero nga daw og sa wa mahatagi og due process, napildi usab si Jonas Sultan nga maoy nihulip kaniya batok ni Paul Butler sa ilang title fight.
Ang maong away usa unta ka laing pagdepensa ni Johnriel Casimero sa iyang titulo, pero pipila na lang ka adlaw sa dili pa ang away, gitangtangan siya sa iyang bakus sa rason nga nakalapas kini sa lagda kalabot sa pagpa reduce sa timbang.
Taodtaod na tang nagsunod ug nag-cover niining boxing, pero karon pa sab ko ka dungog nga gidili diay kining paggamit og sauna bath aron pagtibhang sa timbang.
Kini maoy gihimo ni Casimero unya ang nakapait kay gi-post nila sa social media nga maoy gibasehan sa WBO sa pagtangtang sa iyang titulo.
Sakit kaayo alang ni Casimero ug sa iyang kaubanan ang nahitabo tungod kay grabi na unta kaayo niyang pagpangandam ning maong away pero sa kalit lang naingon ani ang sitwasyon.
Supposedly, niadto pa untang Disyembre didto sa Dubai modepensa si Casimero sa iyang title batok ni Butler, pero nakanselar kini sa dihang wa kini katunga sa tinimbangay kay naospital.
Gidudahan nga gihimo lang rason ni Casimero ang pagpahospital aron pagtabon sa iyang kapakyas sa pagkuha sa iyang timbang.
Hinuon, niadtong higayona, nakakuha si Casimero og mga dokumento nga nagpamatuod nga siya naospital tungod sa sakit nga gastritis.
Kini maoy rason nga giuswag ang maong away nga gikatakda unta kagahapon, Abril 22, 2022.
Pero ning higayona, nakasugat na usab og laing problema ang lumad nga taga dakbayan sa Ormoc.
Kon sa gitara pa, mora og nasintonaw na man hinuon ning boxing career ni Casimero sukad nga miaslom ang ilang relasyon ni Sean Gibbons, ang presidente sa MP Promotions ni Manny Pacquiao.
Naingon og nagkayamukat ug wa na mahapsay ang dagan sa iyang pamoksing kay wala na siya mahatagi og saktong giya sa mga tawo nga maoy nagdala kaniya didto sa Estados Unidos.
Nasagmuyo man gud ni si Casimero sa dihang gamay ra ang premyo nga nadawat sa iyang away batok ni Guillermo Rigondeaux.
Didto nagsugod og kabati ang relasyon nila ni Gibbons.
Morag masabot nga dunay laing grupo nga nagsigi og solsol ni Casimero nga maoy iyang perming gikauban karon.
Imbis ang iyang away ug performance maoy perming giatngan sa mga boxing aficionados, ang iyang mga kontrobersiya nga isyu mao na man hinuon maoy perming magbansiwag sa mga balita.
Dunay hugonhugon nga i-sanctioned sa WBO nga usa ka title fight ang away ni Butler ug Sultan pero wa pa kini hingpit nga madesidihi.
Ang giaprobahan sa WBO mao nga usa lang una kini ka interim title fight. Kon hingpigt na ba gyud nga mawad-an sa iyang titulo si Casimero, kini atong mahibaw-an sa umaabot nga mga adlaw, kay labing siguro susihon man una ni og maayo sa WBO.
Akoy gianugonan ning abilidad ni Casimero kay moluta man nga wala niya ampingi ang iyang pagka world champion.
Di ko kabasol kon ang ubang kritiko mohulagway niya nga midako ang ulo kay duna sab siguro silay rason nga nakita.
Sa gikaingon ko na kaniadto pa, nga kining pagpamoksing ni Casimero gikaluhaan na ni og kontrobersiya.
Kutob ra gyud ta sa pagpanghinaot nga unta iya ning matalidhayan aron mahapsay na unya ang iyang pagpamoksing.
And yes, nagkinahanglan siya og guidance aron maprotehian ang iyang masilawon nga karera.
Ug labaw sa tanan, nga kining mga panghitabo nga nagpalibot sa kaniya maghatag og dako niyang leksiyon sa iyang kaugalingon. Wake up, Johnriel. (jun.migallen22@gmail.com)