Sa sige nakong libotlibot sa Dakbayan sa Sugbo, maorag 20 porsyento lang sa bike lanes ang gigamit sa mga nagbiseklita. O magamit sa nagbiseklita tungod sa kadaghan sa mga sakyanan nga naghunong samtang naghuwat sa pag go sa traffic light.
Daghan sa mga nagbiseklita mas mopalabi nga di mosubay sa lanes tungod kay maorang estoryaha, mogawas gihapon sila aron paglikay sa nag-ukopar nga sakyanan. Naa say daghang nagmotorsiklo mao gihapon, sa bike lane mosubay.
Unya pun-an pa ang bike lanes? Nganong dugangan man ang bike lanes kon di hingpit ug higpit nga mapatuman ang ordinansa alang niini?
Ang Dept. of Public Works and Highways (DPWH) nibutang og bike lanes dihang taas kaayo ang mga kaso sa Covid-19 sa tibuok nasod. Way pagtuon nga gipahigayon, basta butangan lang og bike lanes ang mga karsada, labina ang mga medyo lapad.
Nibutang sila og plastic bollards sa lanes aron di mosulod ang mga sakyanan, apan pakyas kay gipangguba ang kadaghanan ani. Anugon baya kay kwarta sa katawhan ang nausik. Naay uban nga giligsan sa mga sakyanan samtang dunay gipangguba og tuyo, labina sa V. Rama Avenue.
Daghan ang wa makauyon, nakalitan sa kalit nga implementasiyon. Kuwang sa higpit nga implementasiyon sa ordinansa ug edukasyon sa mga biker.
SUPORTA
Kon half-baked ang implementasiyon, mas nindot kon ang lokal nga kagamhanan, pinaagi sa pagpakigtambayayong sa nasudnong kagamhanan, nipabarog na lang og mga pasilidad alang sa pag-ensayo ug pagtudlo og biking. Pagbansay niadtong mga mahiligon sa extreme biking ug pag-edukar sa publiko sa safe riding. Maka produce pa tingali tag world champions kay gagmay pang bata, duna nay natudloan.
Sa tinud-anay lang, daghan kaayo og mabuhat ang kagamhanan unya makigtambayayong sa pribadong mga organisasyon. Nasugdan na gud ni sa akong higalang si manlalaban Gerry Carillo, diin gibansay ang bike patrollers sa Siyudad. Maanindot kon palapdan pa ang koordinasyon tali sa private sector sa sama ani nga mga endeavor.
Sagad sa mga opisyal sa kagamhanan kay reactionary, di pro-active. Mobuhat lang human na nahitabo. Kaning bike lanes reaction man ni sa kadaghan sa nagbiseklita tungod sa paglikay sa public transport.
KAUSABAN
Maayo unta kon duna nay hingpit nga kausaban sa mentalidad sa mga opisyal sa kagamhanan aron makakita tag kausaban.
Ang CCLEX usa ka maayong ehemplo sa publikong estruktura nga nagpakita og pro-active nga mentalidad. Ang management board nakahukom sa pagbutang og parte sa taytayan diin mahimong maka jog ug maka bike. Di ba maanindot?
Kaanindot kon ang atoang highways dunay lahi nga bike lane but naa magsubay sa kilid sa highway. Kon nahimo ni sa ubang mga nasod nga nag-promote og healthy living, nganong di man suwayan sa hinayhinay? Segurado kong di ni mausik, daghan ang mag enjoy kay luwas nang sikaran ang kadalanan.