Usa ka sakop sa rebeldeng New People’s Army (NPA) patay sa engkwentro tali sa kasundaluhan sa Purok 6, Barangay Imbayao, Malaybalay City, Bukidnon sa Abril 18, 2022.

Giila sa militar ang namatay nga si Darren Jane Tilucan. Ang 4th Infantry (Diamond) Division (4ID) nitaho nga duha ka M16 rifles ang narekober human sa engkwentro tali sa tropa sa 1st Special Forces Battalion ug kapin o kulang pito ka elemento sa communist terrorist group (CTG).

Si Major General Wilbur Mamawag, commander sa 4ID, niingon nga ang nalambigit nga CTGs mga tipak nga elemento sa SRC5, NCMRC, kinsa gikan sa Lanao del Sur, nisulay sa pagtabok paingon sa Bukidnon alang sa kaluwasan, human sila gilutos sa mga tropa sa miaging engkwentro sa Barangay Tikalaan, Talakag, Bukidnon niadtong Abril 6, 2022.

Niresulta kini sa kamatayon sa upat ka mga lider sa CTG ug pagkasakmit sa 16 ka high-powered firearms.

Alang sa Abril, ang Joint Task Force Diamond nakakuha na og 33 ka mga armas ug na-neutralize ang kinatibuk-ang 16 ka mga miyembro sa CTG pinaagi sa pagsurender, pagdakop ug mga engkwentro sa ilang area of ​operation sa Northern Mindanao ug Caraga regions. (SunStar Philippines)