Sukad masukad, si Bise Presidente Leni Roberdo pa ang labing unang presidential candidate nga mitaak sa Bantayan island.
Mao kini ang gisulti ni Frankie V. Despi, Bantayan Island Leni-Kiko coordinator, human nibisita ang Bise Presidente sa isla niadtong Huwebes, Abril 21, 2022 sa wa pa motambong sa grand rally nianang gabii sa Dakbayan sa Mandaue.
Si Robredo nilibot sa pipila ka mga lungsod sa Sugbo sa mao nga adlaw, usa niini nga giduaw mao ang Bantayan.
“Sukad-sukad, wa gyuy kandidato pagka presidente nga mibisita sa Bantayan Island. Si VP Leni ang labing una. Sa mga nangaging panahon, ang mga mikandidato pagka presidente nagpadala lang og ilang representante sa kampanya,” sulti ni Despi sa Superbalita Cebu.
Apan di kadto unang higayon sa pagtaak sa Bise Presidente sa isla kay dihang siya kongresista, nakaduaw na siya sa usa sa mga inilang dapit sa lalawigan sa Sugbo sa turismo.
Niadtong 2020, si Robredo, kinsa nipadala og hinabang pinaagi sa iyang Angat Buhay program, nisaad sa pagbisita sa isla ug ang iyang pagduaw niadtong Huwebes maoy katumanan sa saad.
Tungod sa kahagip-ot sa oras, si Robredo nipundo lang og usa ka oras sa pagtambong sa “mini rally” sa lungsod sa Bantayan.
Sagad sa mga nanambong mga mananagat, mag-uuma, senior citizens, mga tinun-an gikan sa tulo ka mga lungsod sa isla ug mga turista nga nahiagi lang.
Ang isla sa Bantayan gilangkuban sa mga lungsod sa Santa Fe, Bantayan ug Madridejos.
Matod ni Despi nga nisaad si Robredo kanila nga palambuon ang serbisyong medikal sa isla.
“Specific to Bantayan was her promise to improve medical care and provide more hospital and clinical services because Bantayan Island only has one small hospital that caters to its three municipalities,” dugang ni Despi.
Kalabot sa suporta sa mga lokal nga opisyal, matod ni Despi nga si Sta. Fe Vice Mayor Naomi Illustrisimo-Espinosa ang nag-inusarang nagpakita sa iyang init nga suporta sa Bise Presidente.
Gawas sa Bantayan, pipila ka mga lungsod sa habagatang kasadpan giduaw sa Bise Presidente sa sayo pa.
Nihapit usab siya sa Danao City sa wa pa siya nitambong sa grand rally sa Mandaue City.