2 ka batang babaye nalumos sa dagat sa Dalaguete

Nangalumos ang duha ka mga batang babaye samtang nangaligo sa dagat ala 1:30 sa hapon sa Biyernes, Abril 22, sa Brgy. Casay, lungsod sa Dalaguete, habagatang Sugbo.

Mga biktima giila nga sila si Jhillary May Belanizo Rivera, 8, grade 3 pupil, taga Brgy. Manangal ug Kylie Lopez, 10, grade 4 pupil, silingan.

Si Police Senior Master Sgt. Arnold Frenal sa Dalagaute Police Station nga nahinabi sa Superbalita Cebu nagkanayon ang mga biktima uban sa mga barkada nangaligo nianang udto.

Ang ilang mga higala nakahukom mga mamauli, apan sila si Rivera ug Lopez gikatahong nangaligo pagbalik sa dagat.

Ang maong dapit dunay dagkong mga bato diin mahimong mangupot ang mga bata samtang mangaligo.

Apan gituohang gumikan sa kakusog sa bawod nangaanod ang mga biktima sa lawod. Ang duha pulos di kahibawo molangoy.

Ang dapit kantilado, lawom ug way nakabantay sa nahitabo kanila. “Ang pag-udto, gibadlong daw ni sila kay lawom dili magkumpiyansa. Unsa pagkaunsaa nibalik mag pangaligo,” dugang ni Frenal.

Si Major Gilfred Baroman, hepe sa Dalaguete Police Station nga nahinabi sa Superbalita Cebu, nagkanayon naabtan pa sa ilang tropa ang mga biktima.

Mga alas 3:30 na sa hapon nila nadawat ang impormasyon.

Gidali nila sa pagdala sa tambalanan apan patay na kini pag-abot.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph