Ningpatigbabaw ang mga sakop sa Spectrum Runners Club nga sila si Jerome Casinillo ug Lizane Abella sa labing unang mayorihiyang running event nga napahigayon sa Sugbo gikan sa pagkuyanap sa pandemya, duha ka mga tuig na ang nakalabay.

Ang gitumbok nga kompetisyon, nga giulohan og RC Goldline Half Marathon 2022 Recovery Run, gipahigayon kagahapon, Abril 24, 2022 sa Pescadores Road, Cebu Business Park sa dakbayan sa Sugbo.

Si Casinillo mitaak sa finish line human sa usa ka oras, 13 ka mga minutos ug 17 ka mga segundos aron dag-on ang men’s 21-kilometer race.

Nagsunod kang Casinillo mao sila si 2nd placer Florendo Lapiz (1:17:23) ug 3rd placer Kenyan Eric Chepsisor (1:18:40).

Sa iyang bahin, si Abella mitali og oras nga 1:41:09 aron angkunon ang patigbabawan ang women’s 21K event.

Ang laing sakop sa Spectrum Runners Club nga si Evamae Villarin (1:44:51) maoy miangkon sa ikaduha samtang ikatulo si Josephina Rodriguez (1:50:20).

Ang mga sakop gihapon sa Spectrum Runners Club nga sila si Mark Mahinay (41:360 ug Asia Paraase (51:16) ang ningdaog sa men’s ug women’s categories sa 12K race.

Ang mga ningdaog sa 6K event mao sila si Jovan Bensig (20:19) sa men’s division ug Ysabel Baldos (29:47) sa women’s category.

Sa 3K race, ang mga ningpatigbabaw mao sila si Jessie Abelgos (10:09) sa men’s event ug junior triathlete Moira Frances Erediano (15:19) sa women’s category.

Nagkanayon si race director Joel Juarez sa Coco Running nga kapin sa 1,000 runners ang ning-apil sa lumba.