Usa ka security guard nga giingong sakop sa Chong drug trade ug gun running group nga naglihok sa dakbayan sa Lapu-Lapu, nadakpan sa mga sakop sa Criminal Investigation and Detection Group (CIDG) Lapu-Lapu City Field Unit atol sa gilusad nga buy-bust niadtong Biyernes, alas 7:30 sa gabii, Abril 22, 2022, sa Sitio Lupa, Barangay Punta Engaño.
Ang nadakpan mao si Castor Sibelo Sagang, 48, ug nagpuyo sa maong lugar nga nakuhaan og usa ka paltik sa kalibre .38 nga Smith and Wesson revolver ug ang upat ka bala niini.
Lakip sa nakuha ang usa ka kalibre .45 colt, magazine ug mga bala ug ang buy-bust money.
Matod ni Police Captain Nigel Sanoy, hepe sa CIDG Lapu-Lapu, nga dugay na nila nga gi-monitor si Sagang human malambigit sa illegal nga kalihukan sama sa gun running, robbery ug illegal drug trade sa dakbayan sa Sugbo ug Lapu-Lapu lakip na sa mga silingang lungsod sa probinsya sa Sugbo.
Migawas ang iyang pangalan human sa taho sa nagpakabana nga molupyo sa Punta Engaño.
Gipaubos na nila sa imbestigasyon kon kinsa ang nag-supply kaniya sa mga paltik nga armas ug mga kauban niini sa illegal nga negosyo.