Tungod sa naglagiting nga kainit sa adlaw ug kaigang sa palibot, nakamata ang suluguong lalaki human gipagngan og electric fan sa iyang agalon.

Sa iyang kasuko, gitigbas ug giluba-patay niya ang agalon kagahapon sa alas 11:00 sa buntag, Abril 24, sa Barangay Dumlog, dakbayan sa Talisay.

Si Nomiriano Lastimosa, Jr. alyas Boss Jing, 54, nagpuyo sa nahisgutang lugar, namatay tungod sa samad sa dinunggaban sa tiyan, bukobuko, liog ug bukton.

Ang suspek nga boy mao si Geeiven Urbano, 37, alyas Iben, 37, ulitawo ug taga Barangay Talamban, dakbayan sa Sugbo.

Si Police Lt. Col. Randy Caballes, hepe sa Talisay Police Station nga nahinabi sa SunStar Superbalita Cebu, nagkanayon nga daan na nga nagkainitay ang duha tungod sa giingong pagkamatay sa mga binuhing isda sa agalon.

Sumala ni Caballes, ang suspek maoy nagbantay sa babuyan ug mga isdaan nga baligya ni Lastimosa sama sa koi ug uban pa.

Si Caballes niingon nga ang suspek boluntaryong nitahan sa ilang buhatan human sa krimen.

Niasoy ang suspek nga namatay ang mga isda gumikan sa kainit sa panahon bisan insakto sa oxygen ug tubig.

“Lami kaayo ang iyang katulog sa payag nakamata gumikan sa kainit,” matod ni Caballes.

Nagdulom ang panan-aw sa suspek, iyang giluba ug gitigbas sa pinote ang iyang agalon hangtud namatay.

“Giyawaan nako ato, Sir, kay pagkakita nako siya man. Ako gikuha ang pinote nalimot nako ato, ako gipapuok sa iyang dughan unya gitiwasag duslak sa liog,” dugang sa suspek sa pakighinabi sa DYSS.

Ang suspek nialegar nga naglagot usab siya sa iyang amo human wa hatagi og suweldo sukad sa miaging tuig.

“Surrender ko, sir, kay mao ra gihapon magtagotago ko madakpan ra, ako mana nahimo ang krimen,” dugang ni Caballes base sa saysay sa suspek.

Si Konsehal Odong Manto sa Dumlog nibutyag sa dySS Super Radyo nga dihang naabtan niya ang biktima, nagtaop ang 24 ka pulgadang pinute sa bukobuko niini ug naligo sa iyang kaugalingong dugo.

Si Urbano, nahinabi usab sa dySS Super Radyo Cebu, nagkanayon nga napuno na siya sa gihimo sa iyang amo.

Ang iyang amo nidemanda nga pabayran og P12 mil ang 200 ka isda nga gapi nga nangamatay.

Sumala pa niini nga siyay gipasanginlan nga hinungdan nga namatay.

Ang biktima nakadagan sa iyang unang pagtigbas, sumala sa suspek, apan dihang iyang naabtan, iya kini gitiwasan hangtud nga namatay.

Nagpakiluoy pa ang biktima sa suspek apan gihansakan kini niya sa makadagan nga higayon sa tiyan.

Ang suspek nipadayag nga andam niyang atubangon ang krimen nga iyang nahimo.

Ang suspek gitanggong na sa kapulisan karon ug gikatakda nga pasakaan og kasong murder karong adlawa, Abril 25, 2022.