Espinoza: Ang hulga sa Covid-19 sa eleksyon
ANG Department of Health (DOH) nagpasidaan nga dunay purohan nga maoktaba ang piliay sa Mayo 9, 2022 sa mga dapit nga mosaka unya ang kaso sa Covid-19. Gipahibawo kini ni DOH Secretary Francisco Duque III atol sa usa ka briefing sa MalacaƱang tungod kay dunay mga dapit na sa nasud nga nagpakita sa pagbalik sa takod sa Covid-19.
Matud sa DOH, dunay walo ka probinsya ug lima ka siyudad nga dunay timailhan nga misaka ang takod sa Covid-19, ug karon ila kining gibantayan ug gisubay. Mao na ni ang posible nga resulta sa mga dagkong rally sa mga kandidato, nga gitugtan ubos sa Alert Level 1.
Ang gibutyag ni Health Undersecretary Myrna Cabotaje mao ang probinsya sa Ilocos Norte, Kalinga, Batanes, Quirino, Catanduanes, Marinduque, Surigao del Sur ug Eastern Samar, ug ang lima ka dakbayan sa Davao, Butuan, Olongapo, Tarlac ug Angeles.
Hinuon, wala mag-ingon si Health Secretary Duque nga dili ipadayon ang May 9, 2022. Apan mahitabo lang ang pagpugong sa DOH nga dili ipadayon ang eleksyon sa Mayo 9, 2022 sa usa ka dapit kon makita basi sa sukdanan sa DOH nga hataas na ug daghan na ang mga naigo sa coronavirus.
Apan kon ang Commission on Elections (Comelec) ang pasultion, dili mapugngan ang piliay sa Mayo 9, 2022 kon pananglitan mosaka ang kaso sa Covid-19 sa usa ka dapit atol sa eleksyon sa sunod buwan kay, matud pa, dili kini usa sa mga hinungdan sa balaod nga maoktaba ang piliay.
Kining Comelec ba mora og dunay himangkaagan kabahin sa panglawas sa tawo o sa kining nagpadayon pa nga Covid-19, nga misaka na gani og balik sa Shanghai, China, ingon man sa pipila ka mga stado sa Amerika. Ang pagsaka sa takod sa Covid-19 tungod kay kumpiyansa na ang katawhan homan sa paghinay sa takod sa Covid-19, nga di na mosul-ob sa face mask ug daghan na usab ang nabakunahan.
Pipila na ka buwan ang milabay homan misumitir ang mga kandidato sa ilang tagsa-tagsa ka certificate of candidacy (CoC), apan wala ta makadungog nga nagpagawas ang Comelec og mga pamaagi nga malikayan ang daghan mga botante nga magdasok unya didto sa mga presinto tungod kay nia pa gihapon kining virus nga daghan na ang namatay.
Unta, ang Comelec nagpagawas og resolusyon nga pun-an ang piliay og duha o tolo ka adlaw sa di pa ang Mayo 9, sama sa gitawag sa Amerika nga "early voting," kon sayo nga pagbotar sa mga botante aron makatag o mabahig ang gidaghanon sa mga botante sa tolo ka adlaw.
Igo ra moingon ang Comelec nga magsul-ob ang mga botante sa face mask ug magtoman sa distansya. Unsaon kaha pagtoman sa distansya sa matag tawo sa kadaghan sa mga botante karon. Maglisud man gani og patuman sa distansya sulod sa mga malls ug pagpasul-ob sa face mask. Samot na sa adlaw sa eleksyon nga way magbantay nga mopatoman sa health protocols.
Manghinaut na lang ta nga di mosaka ang kaso sa Covid-19 ug motuman ta sa health protocols.