Human sa iyang kampanya sa National Basketball League (NBL) sa Australia ubos sa kampo sa Adelaide 36ers, nagkanayon ang batan-ong Pinoy nga higante nga si Kai Sotto nga wala pa siya’y desisyon kon unsa’y sunod nga lakang nga iyang pagabuhaton.
Ang mga sumosunod sa 36ers gustong magpabilin si Sotto sa team apan adunay madanihong oportunidad nga puwede niyang hangupon, ang magpa-draft sa National Basketball Association (NBA).
“The season just ended. I need more time to think about that,” matod ni Sotto nga napatik sa Spin.ph.
Wala pa man tuod siya makadesisyon apan gitataw sa 19 anyos ug 7’3” nga basketbolista nga dili pa siya kuntento sa iyang kapabilidad.
“For me, the work doesn’t stop. I’ll just continue working and developing and whatever comes after that, you’ll see,” dugang ni Sotto.
“I don’t see myself as a complete player right now. I just have to continue developing, getting better with my skills, getting stronger, and getting faster. There’s a lot of things I need to work on and this offseason will be a good time for me to get better.”
Hinuon sa iyang pagduwa sa NBL, napamatud-an na ni Sotto nga kaya na niyang makigkompetensya sa taas nga kalidad sa basketball.
Gani, adunay pipila ka teams sa NBA nga ningpadayag og interes nga mokuha kang Sotto kon makadesisyon na kining magpa-draft sa liga.
Gipasabot ni Sotto nga sayo man tuod nanamilit ang 36ers apan daghan siyang nakat-unan sa iyang pagduwa sa Australian league nga nakatabang pagpalambo sa iyang abilidad.