Dili mominos 20 ka mga paltik nga armas ang gibayloa’g sinakong bugas dihang gipang-surrender sa awtoridad niadtong Sabado, Abril 23, sa Brgy. San Isidro, lungsod sa Asturias.

Kabahin kini sa programa sa Philippine National Police (PNP) nga “Armas Bugti sa Bugas” alang sa pagpakusog sa kampanya batok sa loose firearms.

Si Police Lt. Col. Jeorge Francis Rodrin, Force Commander sa 1st Provincial Mobile Force Company (1st PMFC-CPPO), maoy nangulo sa kalihukan.

Giawhag niya ang mga tawo nga naghupot sa armas nga walay lisensiya sa pagtahan niini aron dili mapasakaan og kaso ug mapriso.

Si Police Senior Master Sgt. Nilo Branzuela, Jr., company executive senior Officer 1st PMFC-CPPO nga nahinabi sa Superbalita Cebu, nagkanayon nga ang programa nagpalambo usab sa ilang relasyon sa komunidad pinaagi sa pagsalig sa PNP.

Ang bugas maisip usab nga tabang sa mga tawo nga nawad-an og trabaho tungod sa pag-igo sa pandemiya sa Covid-19.

Laing nagpadayon nga programa sa PNP mao ang “Kapwa Ko, Sagot Ko” gitumong sa pasumpo sa communist insurgency sa nasod sa malinawon nga pamaagi.

Sumala ni Branzuela, lakip sa ilang gihatag ang mga nilata, ug ubang grocery item alang sa mga ningtahan sa ilang armas.

Sagad kanila mga yano nga lumolupyo, mag-uuma, ug mga barangay tanod nga ninghangop sa programa sa gobiyerno.