Nasangit na usab ang negosasyon sa 93-1 land swap deal tali sa Cebu City ug Cebu Provincial Government human wala nagkauyon ang appraisal committee sa duha ka local government units (LGUs) sa balor sa nalambigit nga mga kabtangan.
Si manlalaban ug Cebu City Councilor Raymond Alvin Garcia niingon sa Lunes, Abril 25, 2022, nga nagplano siya nga makigkita pag-usab kang Gobernador Gwendolyn “Gwen” Garcia aron sulbaron ang kalainan sa duha ka LGUs.
Matod ni Garcia nga gi-appraise sa mga provincial assessor ang mga propyedad gamit ang commercial value bisan kon gigamit kini isip residential area.
Tungod niini, mas mahal ang provincial assessors land valuation kon itandi sa valuation nga gikan sa city assessors, matod ni Gacia.
Gigamit ni Garcia isip sanglitanan ang usa ka propyedad sa Barangay Barrio Luz diin ang sulod nga bahin sa lote giokupahan na sa mga residente apan ang kagamhanang probinsiyal migamit og valuation base sa commercial price niini.
“So you cannot use the same commercial value, what you should use is the residential value, dako kaayog difference,” matod ni Garcia.