Cease and desist order giluwatan ni Mayor Michael “Mike” Rama ngadto sa usa ka waste management facility nga gitumbok nga tinubdan sa grabe ka baho sa Barangay Inayawan, dakbayan sa Sugbo sud na sa kapin sa usa ka semana.
Sa press conference sa Lunes, Abril 25, 2022, si Rama niingon nga ang maong pasilidad wala mag-alagad sa siyudad kondili sa mga pribadong kliyente.
“I have ordered today the issuance of a cease-and-desist order against Bio-Nutrient Waste Management, Inc. owned and operated by one Ema Ramas. Its composting operations have caused foul smell in its surroundings in Inayawan,” matod ni Rama.
Hinuon, wala mohatag si Rama kon unsay piho nga kalapasan nga nahimo sa pasilidad.
Matod ni Rama, “very good reason” ang maong baho aron kinahanglang mohunong na sa operasiyon ang pasilidad.
Gisusi na sa mga kawani sa Department of Public Services (DPS) ang insidente human nakadawat og reklamo gikan sa mga residente, matod ni Rama.
Giklaro usab sa mayor nga ang garbage transfer station sa dakbayan nga nahimutang duol sa landfill sa Inayawan wala makamugna og dili maayong baho.
Niadtong Dominggo, Abril 24, niluwat og citation ang City Environment Sanitation Enforcement Team (Ceset) ngadto sa pasilidad ug kon makatuman na sila sa mga hangyo sa Siyudad, maka-operate na usab sila.
Dugang pa ni Rama nga ang panglawas ug kaayohan sa mga tawo nga nagpuyo sa maong dapit susihon sa City Health Department ug barangay health center.