Gikatahapang tulisan nga nidunggab sa maka 12 ka higayon sa taxi driver sa Lahug niadtong Abril 14, 2022 nasikop sa kapulisan human nakigpinusilay kanila dihang ilang gidakop sa Barangay Mambaling, Cebu City sa Biyernes.
Niadtong Biyernes sa Abril 22, 2022 sa alas 2:05 sa hapon, nadakpan sa mga sakop sa City Investigation and Detective Management Unit sa Cebu City Police Office si Aldwin Codera, 35, taga sityo Tarcom, Brgy. Lahug, Dakbayan sa Sugbo.
Si Codera ang gitumbok nga nitulis taxi driver (ngan gipugngan tungod sa iyang hangyo) sa Nivel hills, Barangay Lahug, dakbayan sa Sugbo.
Matod ni Police Lieutenant Colonel Maria Theresa Macatangay, information officer sa CCPO, nga human sa pagpanulis niadtong Abril 14, gihimo dayon ang subsub nga imbestigasyon pinaagi sa pagsubay sa mga kuha sa CCTV camera.
Nakakuha silag hulagway nga nitakdo sa usa ka notadong tulisan ug kawatan nga positibo usab nga giila sa taxi driver.
Tungod niini, ilang gilusad dayon nila ang manhunt operation hinungdan nga niadtong Abril 22 sa alas 2 sa hapon, ila na unta nga dakpon si Codera, apan nisukol, namusil sa mga pulis.
Gibawsan siya sa pagpusil nga niresulta sa pagkaigo sa iyang lawas ug dali siyang gidala sa Cebu City Medical Center (CCMC).
BACKGROUND
Nadakpan na kaniadto sa Mabolo Police Station si Codera sa kasong pagpanulis ug carnapping apan nakagawas human sa iyang sentensiya sa bilanggoan.
Giangkon, matod pa, ni Codera nga siya ang nitulis sa taxi driver tungod sa kalisud ug aduna pa siyay utang sa illegal nga drugas.
“Accordingly sa iyaha sad ni nga saysay sa atoa, he was already kanang kapit sa patalim because naay duha ka individual nga naningil na sa halin sa illegal drugs. Dili niya mabayran kay wala pa siyay kwarta. So, ato nga time ni board siya ani nga taxi, wala siyay lain nahuna-hunaan but tulison ang maong taxi driver,” matod ni Macatangay.
Ang taxi driver nihangop sa pagkasikop ni Codera sanglit dili tiaw ang iyang kahadlok sa iyang gidangatan sa dihang nideklara og tulis si Codera ug gidunggab pa siya sa maka 12 ka higayon.
Bag-o lang siya nakagawas sa tambalanan ug padayon pa siya nga nagpaalim sa iyang mga samad sa panimay .
Iyang gibutyag nga nailhan niya si Codera tungod kay nakita niya ang panagway niini sa center mirror sa iyang unit atol sa komusyon sa sulod sa taxi.
Sa pagkakaron dili lang una siya mobalik sa pag pamasada sa taxi tungod kay na trauma pa siya ug presko pa usab ang 12 ka samad nga iyang naangkon.
Iyang tubag sa pamahayag ni Codera nga napugos siya sa pagpanulis tungod sa kalisud ug aduna siyay utang sa illegal nga drugas.
“Giingnan lang unta ko niya aron ihatag nako diretso, dili lang unta siya manunggab,” matod sa taxi driver. Aduna siyay duha ka anak babaye nga nagpangidaron og 18 ug 14 anyos nga padayon nga nagtungha.
Bisan pa sa ilang mga galastohan sa panimay ug sa pag- eskwela sa iyang mga anak, dili lang una siya mobalik sa pagpamasada tungod sa kahadlok.
Tulo ka mga kaso ang atubangon ni Codera nga mao ang robbery with frustrated homicide, illegal possession of firearms ug kalapasan sa Comelec gun ban.