Tubilan: Patas-an ang minimum nga pusta

Tubilan: Patas-an ang minimum nga pusta

Nagkadaghan na ang mga insidente sa kawat, lungkab ug ubang klase sa mga krimen sa atong komunidad aron ang suspek makakwarta. Niadtong mosugod pa ang administrasyon ni Presidente Rodrigo Duterte wa na kini mahitabo apan karong naghinapos na, nibalik na.

Gituohan nga kining insidente resulta kini sa paghimo nang legal sa pipila ka mga sugal sama sa e-sabong. Kon matag adlaw ka mapildi ini nga sugal, unya wa kay negusyo o ba kaha wa kay kuhaan og salapi aron mamusta na usab ka sa mga mosunod, posible ang uban maghuna-huna og dautan aron makasapi,

Pipila na ka mga taxi driver ang akong nasakyan diin naghisgot nga ang ilang mga kauban naungo sa e-sabong. Ang ubang mahiligon sa manok ug sabong matag adlaw sab mapildi ug nangita og paagi aron makakwarta aron bawion ang ilang pildi karong adlawa.

Kining sabong nalakip na sa atong kultura nga sa taas nga katuigan apil na sa kalihokan kon naay fiesta sa barangay, lungsod o kaha sa dakbayan. Dunay derby nga i-promote dayon unya maglambigit na sa minilyon nga premyo.

Maayo na lang nga kini mahitabo ka usa sa usa ka tuig unya ang uban buwang mahitabo ka usa or kaduha matag semana unya gikinahanglan nga moadto ka sa buwangan aron adto ka mamusta. Naay uban, kon sabton nila nga way kwarta, di na sila moadto.

Kining e-sabong matag adlaw na gihimo. Gani 24/7 pa ang operasyon niadtong mga naay franchise nga anaa na sa nagkadaiyang suok sa atong palibot kay ma-access man kini bisan unsang orasa kay online lagi. Busa matag adlaw usab ang pildi. Kadtong mga sugarol nga daghan og kwarta, way problema kon mapildi kay naa pay ikapusta sunod adlaw. Apan kadtong galisod sa ilang pangita unya mamusta sa e-sabong, asa man silay ikapusta sunod adlaw?

Mas maayo tingali nga may balaod nga ipatuman nga patas-an ang pusta sa e-sabong sama sa P1000 ang minimum bet sa matag sultada. Niini nga paagi kadtong di makaabot sa pusta unya manugal silag ubos niini nga kantidad dakpon.

Kini lang ang paagi nga kining mga sugarol nga galisod sa ilang salapi di mosamot kaut-ut ug sa panahon na nga nagsobra na ang ilang kwarta, mao na ang panahon nga manugal sila kay nahatag na man nila ang ilang gikinahanglan sa pamilya. (josephelvirtubilan@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph