NAKITA sa daghang Dabawenyos ang panginahanglan alang sa limitado nga face-to-face (F2F) classes nga maoy pinakamaayo nga "learning modality" sa pagpalambo sa pagpakigsandurot nga sosyal sa mga tinun-an, sumala sa usa ka surbey.
Sa surbey nga gilusad sa University of Mindanao Institute of Popular Opinion (UM-IPO) gikan Marso 22 hangtud 28, halos unom sa 10, o 57 porsiyento sa mga respondente nakakita sa panginahanglan alang sa limitado nga F2F classes sa ilang kabataan o anak, samtang tulo sa 10 nagpadayag nga ang tinawo (pisikal) nga pag-eskuwela di pa kinahanglan ug angay pang lugwayan og lain pang tuig.
Ang nahabiling usa sa 10 ka Dabawenyos di pa segurado sa panginahanglan sa F2F classes sa pagkakaron.
Sumala sa UM-IPO nga ma-attribute kini nga mga Dabawenyos nakauyon na sa "online and modular learning setups" sa panahon sa pandemya nga miabot na og duha ka tuig.
Apan mga respondente natunga sa panglantaw sa kaandam sa mga tinun-an diha sa "face-to-face" nga pagtuon. Nagpakita ang surbey nga tulo sa 10 ka Dabawenyos nagtulo nga ilang mga anak andam na niini, samtang hapit upat sa 10 ka Dabawenyos nagsulti nga ang mga tinun-an sa ilang panimalay "somewhat ready."
Sa pikas bahin, duha sa 10 ka Dabawenyos nagkanayon nga ang ilang mga anak sa ilang mga balay duna nay gamay nga kaandam, uban sa usa sa 10 nagsulti nga dili.
Natunga sab ang resulta sa surbey bahin sa panglantaw kon ang teknolohiya ba paigo na alang sa F2F-ready classroom. Upat sa 10 niuyon nga tulunghaan andam na may kabahin niini, tulo sa 10 hugot nga niuyon, samtang duha sa 10 di pa seguro kon andam na ba ang mga tulunghaan.
Sa dihang gipangutana kon andam na ba ang mga magtutudlo alang niini, upat sa 10 nagtuo nga andam na ug tulo sa 10 nagtuo nga andam na gyud kaayo.
Ang ubang mga respondente di pa seguro o kaha nagtuo nga di pa andam sa bag-ong "setup."