Lima ka kilo nga gituohang shabu nga nasakmit sa kapulisan sa dakbayan sa Sugbo niadtong Sabado, Abril 23, atol sa dungan nga anti criminality and law enforcement operation gikan day sa lalawigan sa Sulu sa Mindanao nga gipadala pinaagi sa usa ka courier company.

Tungod niini, ang kapulisan makig-alayon sa maong mga kompaniya aron mapugngan ang pagpalusot sa mga kontrabando nga iagi sa courier services.

Dul-an sa P35 million nga balor sa illegal nga drugas ang ilang nasakmit nga usa sa labing dako nga nakuha sa usa ka adlaw lang nga operation.

Matod ni Police Lieutenant Colonel Maria Theresa Macatangay, information officer sa Cebu City Police Office (CCPO), nga sa ilang gihimo nga imbestigasyon, nasuta nga gikan sa probinsya sa Sulu ang kinilo nga drugas.

Wala mamatikdi sa Mindanao nga nalutsan silag kontra bando ug malampuson nga niabot sa siyudad sa Sugbo.

“Kining mga dagko kaayo nga nadakpan accordingly sa ilang pagpangutana pag tan-aw sa mga documents nakita sa pag imbargo aning illegal drugs gikan kini sa Sulu sa Mindanao....So naa sa sulod sa usa ka parcel,” matod ni Macatangay.

Ang kapulisan mihimo nag lawom nga imbestigasyon pagsubay sa nagpadala sa kontrabando sanglit aduna may ngalan kon kinsa ang gipadalhan ug sa nagpadala niini.

Nakig-alayon na sila sa logistics service company aron masusi ug mailhan ang mga nagpaluyo sa pagpadala sa kapin sa lima ka kilo sa gituohang shabu paingon dinhi sa dakbayan sa Sugbo.

“Ang atoang intelligence personnel labi na ang station nga nakasakmit ato are doing various effort to trace, of course naa man nay parcel naay pangalan so that name of that individual written on that parcel ato nanang gipaabot didto sa mga hingtungdan didto sa Sulu,” dugang ni Macatangay.

Niadtong Sabado sa buntag, ang Mambaling Police Station nakasakmit og kapin sa duha ka kilo nga shabu sa ilang duha ka anti-illegal drugs operation.

Sa Sabado sa alas 6 pasado sa gabii, ang Mabolo Police Station nakasakmit og tulo ka kilo sa gituohang shabu.

Ang mao nga mga illegal drugs managsama og tinubdan sa Sulu.

Di na bag-o sa kapulisan ang mga nasakmit nga illegal nga drugas nga gipadala sa mga courier company nga nakalusot ug wala mamatikdi sa mga kawani niini.