Adik sa PC games mipatay

Gihulagway nga na-adik sa computer games ang 15 anyos nga suspek ug notadong kawatan ang way kaluoy nga nidunggab patay sa iyang iyaan sa panag-agawan ug umagad niini.

Ang krimen nahitabo kagahapon, Abril 26, sa kaadlawon sa Purok Bansay-Bansay, Barangay Nailon, Dakbayan sa Bogo.

Ang mga biktima giila nga sila si Cerila Abacial Francisco, 62, ug daughter-in-law nga si Mary Ann Francisco, 39, pulos residente sa maong dapit.

Atol niining pagsuwat wa pa madakpi ang batan-ong suspek nga gitago sa pangalang Romy.

Sigun sa asoy ni Police Lt. Colonel Florendo Fajardo, hepe sa Bogo City Police Station, nga gidudahan nga mangawat hinungdan nga nisaka sa balay sa mga biktima.

MILUSOT SA LUNGAG

Sa nagpadayong imbestigasyon sa Bogo Police Station nasuta nga sa giayo nga lababo sa may kusina sa panimalay sa mga Francisco niagi ang suspek.

Ang banggera giingong adunay lungag diin nilusot si Romy nga gamay og panglawas hinungdan nga nakaagi sa maong lungag.

Milahos sa lawak ni Mary Ann si Romy ug matod pa nangutingkay sa mga butang apan nakamata ang biktima hinungdan nga nahitabo ang komosyon.

Way pagduha-duha nga giduslak ni Romy si Mary Ann nga nagpunay og panagang.

Samad dinunggaban sa tuo ug wala nga ilok, tuo nga abaga ug sa iyang bukton ang naangkon sa biktima.

Nadunggan pa nga nag-agulo si Mary Ann hangtod nga nakabsan sa kinabuhi.

MISANGPIT OG PANABANG

Tungod sa kasikas sa pikas lawak, gisusi ni Ginang Cerila ug nangayo og pakitabang sa mga silingan.

Gisunod sa suspek og dunggab ang senior citizen nga adunay samad sa agtang ug liog hinungdan sa iyang hinanaling kamatayon.

Dali nga misibat si Romy sa dihang naukay ang mga silingan.

WAY NADALA

Pahibawo ni Fajardo nga walay nadala si Romy nga kuwarta ug mga alahas sa biktima kay sa ilang pagsusi intact ra ang maong butang. Kini tungod sa pagdali-dali og sibat niini sa dihang nabulabog ang iyang dautang tinguha.

Giingong adunay kantidad nga hiniposan ang mga biktima tungod kay aduna silay gamay nga negosyo nga hayan maoy giinteresan ni Romy.

Usa sa mga nakasaksi ang positibo nga ni-ila ni Romy sa dihang nakit-an siya nga nikaratil og dagan nga naghukas nga nigawas sa panimalay sa mga Francisco.

BADLUNGON

Gitug-an sa amahan ni Romy nga ig-agaw sa bana sa napatay nga si Cerila nga badlungon ug latagaw ang iyang anak.

Sumala pa nga adunay mga higayon nga dili mopauli sa ilang balay ug naungo sa pagduwa og online games.

Dunay impormasyon nga nakuha sa kapulisan nga naila nga kawatan si Romy. Gani nadakpan kini niadtong Pebrero sa kasong pagpanglungkab uban sa laing mga menor de edad.

Base sa record sa Women and Children’s Protection Desk sa Bogo Police nga gi-release ra sab si Romy sa Department of Social Welfare and Development.

Si Romy maoy kinamaguwangan sa unom ka mga managsuon.

Ang iyang amahan usa ka sinaligan nga trabahante sa usa ka resort samtang ang iyang inahan way trabaho.

Atol niining pagsuwat nagpadayon ang hot pursuit operation sa kapulisan batok sa maong menor de edad.