Ibutyag sa Gilas Pilipinas ang molangkob sa ilang 12-man final lineup sa dili pa sila mogikan paingon sa Hanoi, Vietnam alang sa 31st Southeast Asian Games.
Nagkanayon si team manager Butch Antonio nga sa lagda sa matag duha ka mga tuig nga kompetisyon, kinahanglang isumiter daan ang lineup sa partisipanteng mga nasod.
Ang Gilas Pilipinas nakatakdang molarga paingon sa Vietnam karong Mayo 13, 2022, tulo ka mga adlaw sa dili pa ang kompetisyon.
“Based on SEA Games rules, we have to submit our final 12 before we leave. Unlike in FIBA tournaments na a day before the game ang submission ng lineup,” pasabot ni Antonio nga napatik sa Spin.ph.
“So we have to submit earlier.”
Ang Gilas pool kasamtangang gilangkuban og 16 ka mga magduduwa nga gipangulohan sa mga Sugboanong sila si JuneMar Fajardo ug Roger Pogoy.
Naa sab sa pool sila si Matthew Wright, Kevin Alas, Robert Bolick, Kib Montalbo, Troy Rosario, Poy Erram, Mo Tautuaa, Isaac Go, Will Navarro, Japeth Aguilar, Thirdy Ravena ug Dwight Ramos.