Bisan kon daghan nang mga lugar sa Pilipinas nga ubos sa Alert Level One, mitumaw gihapon ang pangutana kon pabotaron ba kadtong mga botante nga dunay sintomas sa Covid-19 sa eleksiyon karong umaabot Mayo 9, 12 ka adlaw gikan karon?
Tan-awon nato ang Batakang Balaod bahin sa katungod sa matag Pilipino sa pagboto.
Ang Section 1, Article V, 1987 Constitution, nagkanayon, “Suffrage may be exercised by all citizens of the Philippines not otherwise disqualified by law, who are at least eighteen years of age, and who shall have resided in the Philippines for at least one year, and in the place wherein they propose to vote, for at least six months immediately preceding the election. No literacy, property, or other substantive requirement shall be imposed on the exercise of suffrage.”
Ubos sa samang balaod, makabotar bisan ang mga disabled ug ang mga illiterate kun kadtong di makamaong mosuwat ug mobasa. Wa maghisgot nga diskwalipikado ang mga masakiton.
Alang kang Health Secretary Francisco Duque III, mas maayo nga ang mga botante nga dunay Covid-19 symptoms nga magpuyo na lang sa balay aron di manakod sa laing mga tawo. Subay kini sa ilang policy nga mag-isolate kadtong dunay sintomas sa Covid-19.
Apan angay natong masayran nga ang dunay gahom sa pagpahigayon sa eleksiyon mao da ang Commission on Elections (Comelec). Ug subay sa Comelec protocols, ang tanang mga botante moagi og health screening ug temperature check sa di pa mosud sa voting centers.
Ang botante nga dunay sintomas sa Covid-19 ibutang sa isolation polling places aron adto sila didto makabotar. Sa laktod, ang mga botante nga dunay sintomas sa Covid-19 makabotar gihapon sa eleksiyon karong umaabot Mayo 9 apan ilahi sa kadaghanan.
Matod pa ni manlalaban Ferdinand Gujilde, tigpamaba sa Comelec Regional Office 7 (Central Visay), ang symptomatic nga mga botante dili angay hikawan sa ilang katungod sa pagbotar karong umaabot nga lokal ug nasudnong piniliay. Susamang baruganan gipadayag ni manlalaban Jerome Brillantes, Comelec Cebu Provincial Office acting elections supervisor.
Midugang si Gujilde nga di apil sa dikwalipikasyon sa usa ka botante kon dunay siyay sintomas sa Covid-19. Mao kini ang hinungdan, matod niya, nga di kinahanglan ang vaccination card aron makabotar sa umaabot nga eleksiyon.
Sanglit wa man hisguti sa Comelec resolution ang bahin sa symptomatic nga mga botante, kadtong adunay temperatura nga labing menos 37.5 o mas taas sa ikaduhang pagsusi sa entrada sa mga sentro sa pagboto gitugotan nga makabotar sa lugar nga ilang himuong isolation nga gituyo alang kanila aron di sila ma-disenfranchise. (edbarrita@gmail.com)