Gisugdan kagahapon, Abril 26, sa kapulisan sa Dakbayan sa Sugbo ang pagpatuman sa full alert status sulod 12 ka adlaw sa dili pa ang adlaw sa piniliay.
Gipakanselar ang tanang leave of absence ug passes sa mga pulis ug naka-standby alert alang sa posibling pag-deploy kanila sa bisan asang dapit sa dakbayan.
Matod ni Police Lieutenant Colonel Wilbert Parilla, deputy director for operations sa Cebu City Police Office (CCPO) nga gimandoan ni Police Colonel Ernesto Tagle ang tanang police stations nga mohimog accounting sa ilang tanan nga personnel.
Gipahibawo hinuon ni Parilla nga kontrolado pa nila ang sitwasyon sa siyudad sa Sugbo.
Gani walay barangay nga gipaubos sa election watch list areas gumikan kay walay insidente sa mga miaging national election.
Moabot sa 900 ka mga pulis ang gitakdang ipakatap sa mga clustered polling precincts sa tibuok dakbayan sa higayon nga magsugod na ang paghatod sa mga vote counting machines (VCM) lahos na sa adlaw sa eleksiyon sa Mayo 9, 2022.
Walay augmentation nga ipadala ngadto sa CCPO sanglit dili man gubot ang dakbayan, inay sila ang mopadalag 60 ka personnel alang sa laing probinsiya.
Samtang moabot usab sa 458 ka mga police personnel ang apil sa mobotar sa absentee voting sugod karong adlawa, Abril 27, 2022, hangtod sa Huwebes sa Abril 28 sa Abellana National School.
Matod ni Parilla nga ang maong mga personnel mao kadtong dili makabotar sa adlaw sa eleksiyon sanglit didto narehistro sa ilang mga probinsya.
Ang Abellana Police Station gitahasan sa paghatag sa seguridad sa mga polling precincts sugod sa alas 6 sa buntag hangtod matapos ang botasiyon.