Asawa nasakpan sa akto sa bana uban sa iyang kabit ibabaw sa salag sa ilang lawasnong kalipay sa usa ka tree house sa Sitio Sipaway, Barangay Luray 2, dakbayan sa Toledo, alas 12:10 sa kaadlawon kagahapon, Abril 27.
Ang asawa nga si Ana (dili tinuod ngalan), 35, nakarelasyon sa ilang trabahante nga si George (dili tinuod ngan), 29, nagtaban ug nagtago-tago sa dakbayan sa Toledo, Sugbo gikan sa Barangay San Isidro, Loreto, Agusan Del Sur.
Ang bana si Franco (dili tinuod ngan), 37, nakadawat og impormasyon nga naa sa Toledo iyang asawa uban sa kabit nga ilang helper nga tig-spray sa ilang tanom sa farm.
Ang negusyante nga bana nilarga padulong sa Sugbo aron pagsusi sa nadawat nga kasayoran.
Si Police Staff Sgt. Alfredo De Gracia, imbestigador sa Toledo Police Station nga nahinabi sa Superbalita Cebu, nagkanayon nga ang bana uban sa 16 anyos nga anak babaye nangayog panabang alas 10:00 sa gabii niadtong Martes, Abril 26.
Matud ni Police Staff Sgt. De Gracia, ilang gisuhid ang dapit ug gihulagway niini nga nag-uyog-uyog ang tree house nga sama sa giduyan ang duha.
“Grabe ilang kombate kay bugnaw ang panahon, nag-uwan. Naaktuhan namo uban sa bana hubo sila..,” dugang ni De Gracia.
Ang duha dali nilang gipangpusasan samtang gikakomprontasi sa bana.
Ang bana nipadayag nga wala siya magdahom nga mahimo sa iyang asawa ug kaabag sa farm.
Gipadayag niini nga na-busy siya pagbantay sa ilang tindahan sa merkado.
“Mao diay mobalibad ka nako permi kon ‘manguhit ko’ kay nagsige na diay ka palami niya (kabit),” sumala ni De Gracia, nikutlo sa bana.
Ang mga suspek ningbutyag nga siyam na ka bulan na nga gitago nila ilang relasyon hangtod nga nakahukom sila nga magtaban sa miaging semana.
Niadtong Lunes sa hapon, Abril 25, naabot sila sa Toledo kay duna silay kaila.
Gipadayag sa lalaki nga temporaryo lang una sila sa tree house kay wala sila masuhito sa dapit ug mamalhin unta silag laing lugar pero naabtan sa bana.
Giangkon ang krimen sanglit nahimo nila kay sila nagkahigugmahay.
Kasong adultery ang giandam sa kapulisan batok sa mga dinakpan.
Samtang, ang Superbalita Cebu nituyo sa pagtago sa sa mga ngan sa nalambigit sa ‘crime of passion’ aron dili maduhig sa kauwaw ang ilang pamilya, labi na sa mga mernor de edad nga anak, nga masungog unya sa ilang barkada o kaduwa.