SUBLING gibalik sa kagamhanang probinsiyal sa Davao del Sur ang curfew sa tibuok probinsiya gikan alas 9 sa gabii hangtud alas 4 sa kaadlawon sugod Huwebes, Abril 28 hangtud sa Mayo 15 aron nga makontrola ang posibleng kasamok nga dunay kalambigitan sa bugnong lugaynon.
Nagpagawas si Governor Marc Douglas Cagas sa Executive Order (EO) No. 24 o "An Order Enforcing Curfew and Regulating Other Activities Until May 15, 2022."
"In addition to Covid-19-related problems, there is a need to immediately control the spate of threats and violence to preserve the peace and protect the lives and liberty of the people in the province," matud ni Cagas sa EO.
Dugang pa niini nga dunay panginahanglan sa paghigpit sa "anti-terrorism and anti-criminality surveilance" sa pipila ka bahin sa probinsiya base sa "intelligence reports".
"There is a need to support the Davao del Sur Provincial Police Office in their anti-criminality effort to weed out lawless elements and prevent the latter from inficting harm on the peace-loving people of Davao del Sur," dugang pagtin-aw sa gobernador.
Subay sa EO, kadto lang mga esensiyal nga trabahante kansang trabaho natunong sa curfew, medical frontliners, kadtong naa sa public utility nga kompaniya, agricultural ug non-agri cargo, biyahero nga pagawas o moagi sa siyudad, ug mga pasyente nga mogawas ug gikan sa ospital ang gitugtan.
Tanang establisemento, gawas lang sa ospital, parmasiya ug kadtong nahan-ay ubos sa curfew ordinance sirado gikan alas 8 sa gabii hangtud na sa alas 4 sa kaadlawon. Mga hotel, motels, inns ug samang establisemento kinahanglang magrehistro sa tanan nilang mga mosulod nga bisita matag adlaw.
Tanang motorista kinahanglan nga magpresenta og balido nga ID ug magtangtang sa ilang helmet o magpaubos sa ilang mga bentana sa sakyanan alang sa inspeksiyon sa tanang mga checkpoints.
Gikanayon ni Cagas sa Facebook post niadtong Abril 17 nga dunay gialegar nga presensiya sa "500 guns for hire" nga gipakatag sa probinsiya alang sa taliabot nga 2022 eleksiyon.
Gitin-aw niini nga bisan og ang impormasyon kinahanglan pa og beripikasyon, apan ila kining giseryuso tungod kay uban matud pa niini nga mga armado naa na sa Kiblawan.
Gisulti sab ni Police Regional Office-Davao Director Benjamin Silo nga ila nang giimbestigahan ug gibalidar ang taho sa gobernador.