Human sa usa ka season nga pagduwa sa National Basketball Association (NBA) sa Australia ubos sa kampo sa Adelaide 36ers, nagtuo ang batan-ong Pinoy nga higante nga si Kai Sotto nga panahon na aron mosuway siya pagsulod sa National Basketball Association (NBA).
Gibutyag sa 19 anyos ug 7’3” nga basketbolista, kinsa maoy napiling Fans MVP sa NBL, nga magpalista siya sa umaabot nga 2022 NBA Rookie Draft.
“I have declared for the 2022 NBA Draft. Please pray for and support me during my quest to fulfill my ultimate dream,” pamahayag ni Sotto sa iyang Instagram post diin gipadayag sab niya ang iyang utang kabutbut-on sa 36ers.
Sa 23 ka mga higayon nga nakapakita siya og aksiyon sa NBL, si Sotto nag-average og 7.32 puntos, 4.36 rebounds, ug 0.68 block sa 15.2 minutes playing time.
Kon makuha, hayan si Sotto maoy ikaduhang sunodsunod nga sakop sa 36ers nga makasulod sa NBA sunod ni Josh Giddey, kinsa gipiling 6th overall pick sa Oklahoma City Thunder sa 2021 NBA Rookie Draft.
“To the 36ers Management, my teammates, my coaching staff and my agent Joel Bell, I am a better man and a better professional player than a year ago because you all took me under your wing and challenged and mentored me to live up to expectations,” dugang ni Sotto.
Nagtinguha si Sotto nga mahimong labing unang lumad nga taga Pilipinas nga makaduwa sa NBA.
Sa kasamtangan, adunay duha ka Fil-Ams nga naa sa NBA. Kini mao sila si Jordan Clarkson sa Utah Jazz ug Jalen Brown sa Houston Rockets.
Gipasabot ni Sotto nga tungod sa suporta sa iyang mga sumosunod, mas nadasig siyang mogukod sa iyang pangandoy.
Ang 2022 NBA Rookie Draft gikatakda karong Hunyo 23, 2022 sa Barclays Center sa Brooklyn.