Ama-ama ug ang step grandfather nga giakusahang nagtinabangay sa paglugos sa 10 anyos nga batang babaye sa Barangay Somosa, lungsod sa Tabogon, nasikop niadtong Lunes, Abril 25, sa alas 5:30 sa buntag tungod sa reklamo sa bata.
Ang duha nga amahan ug anak, giakusahan sa bata nga nagpuli-puli sa paglugos kaniya sukad pa niadtong 2021 kon wa ang iyang inahan sa balay.
Mga ngan sa mga suspek ug biktima gipugngan aron matago ang identity sa bata nga biktima.
Ang giakusahan nga lolo nag-edad og 73, biyudo samtang ang iyang anak nga ama-ama sa bata nag-edad og 30.
Si Police Staff Sgt. Crisanta Antopina, hepe sa Women’s and Children’s Protection Desk (WCPD) sa Tabogon Police Station nga nahinabi sa Superbalita Cebu, nagkanayon nga sila si Doming (di tinuod nga ngan), ug iyang anak nga si Luis (di tinuod nga ngan), nadakpan tungod sa pagtaho sa barangay kapitan sa Somosa sa alas 3:00 sa hapon.
Gihimo dayon ang operasiyon sa kapulisan ug ang duha ka mga suspek nasikop sa pagka alas 5:30 sa hapon sa samang adlaw.
NISUMBONG
Kugihan ang 10 anyos nga bata ug kanunay manuroy og binangkal ug sa naasoy nga adlaw, ang bata naabot pagpanuroy sa iyang baligya sa barangay hall.
Ang bata, kinsa wala na makaantos, sekreto nga nisulti kang Barangay Kapitan Wilfredo “Tata” Villareal sa iyang gidangatan sa ama-ama ug step grandfather.
“Nakahigayon siya pagsulti sa Kapitan , gisekreto niya kabahin sa binuhatan sa iyang ama-ma ug amahan niini,” matod ni Antopina.
Asoy sa bata nga niadto pang miaging tuig gipuli-pulihan siya og lugos sa duha, apan nahadlok siyang motug-an kay gibaharan siya sa mga suspek nga patyon.
Sila si Doming ug Luis, matod sa bata, mohimo sa krimen sa panahon nga dunay lakaw iyang inahan.
Dali nga gi-rescue ang bata human nakuha ang detalye sa reklamo ug gisikop ang mga suspek.
Ang mga suspek, dihang gipangsikop, hugtanong nanghimakak sa krimen.
Ang duha ningpadayag nga gitumo-tumoan sila sa bata.
Ang bata naa giatiman na sa Department of Social Welfare and Deleopment (DSWD) human na-trauma sa nahitabo kaniya.
Samtang mga suspek na-inquest na sa buntag sa Huwebes, Abril 28, sa Provincial Prosecutors Office sa kasong statutory rape.
Ang kaso way gitugot nga piyansa kay kini heinous crime.
Ang bata gi-schedule nga ipahiling sa Pink Room sa Vicente Sotto Memorial Medical Center (VSMMC) aron isuportang ebidensiya sa kaso.